Të paktën nëntë njerëz janë vrarë si pasojë e sulmeve të Rusisë me dronë dhe raketa në Kiev, thanë zyrtarët ukrainas të enjten.
Sulmet ndodhën vetëm pak orë pasi zyrtarët thanë se është shënuar përparim drejt përfundimit të luftës gjatë bisedimeve të mbajtura në Londër mes përfaqësuesve të SHBA-së, Evropës dhe Ukrainës.
Shërbimi Shtetëror i Emergjencave i Ukrainës tha se 63 njerëz janë plagosur, përfshirë gjashtë fëmijë, gjatë sulmeve të natës.
“Rusia ka kryer sulm të kombinuar masiv në Kiev” tha Shërbimi i Emergjencave në Telegram.
Ndërtesa banimi kanë pësuar dëme, ndërsa “kërkimet për njerëz nën rrënoja janë duke vazhduar”, thuhet në njoftim.
Këto sulme filluan vetëm disa orë pasi përfunduan bisedimet në Londër dhe pasi presidenti i Shteteve të Bashkuara, Donald Trump, theksoi se mendon se ka arritur marrëveshje me presidentin e Rusisë, Vladimir Putin, dhe atë të Ukrainës, Volodymyr Zelensky, për t’i dhënë fund luftës.
“Mendoj se Rusia është gati. Shumë njerëz kanë thënë se Rusia donte të merrte gjithçka. Unë mendoj se kemi një marrëveshje me Rusinë. Tani duhet të arrijmë marrëveshje edhe me Zelenskyn”, u tha Trump gazetarëve në Shtëpinë e Bardhë.
Trump gjithashtu tha se e kishte më të vështirë seç kishte pritur të bashkëpunonte me Zelenskyn.
“Mendoja se do të ishte më e lehtë të merresha me Zelenskyn. Deri tani, ka qenë më e vështirë… Por, mendoj se kemi marrëveshje me të dy”, tha ai.
I pyetur për raportimet në lidhje me një propozim amerikan që Krimea të njihet si territor i Rusisë, Trump tha se ai “nuk ka të preferuar” mes Ukrainës dhe Rusisë dhe se dëshiron vetëm që lufta të përfundojë.
Më herët, zyrtarë të tjerë të administratës amerikane thanë nuk është arritur ende ndonjë marrëveshje dhe se Shtetet e Bashkuara mund të tërhiqen nga bisedimet për paqe, nëse nuk do të ketë përparim të shpejtë.
Zelensky, i cili e ka hedhur poshtë propozimin për Krimenë, tha se emocionet kanë qenë “të larta” në Londër, por shtoi se takimi mes përfaqësuesve nga pesë vendeve ishte gjë pozitive.
“Pala amerikane ndau vizionin e saj. Ukraina dhe vendet e tjera evropiane paraqitën qëndrimet e tyre. Shpresojmë që pikërisht kjo punë e përbashkët do të çojë në paqe të qëndrueshme”, shkroi Zelensky në X.
Trump paralajmëroi më herët Ukrainën në rrjetet sociale se ajo duhet të bëjë marrëveshje për ta përfunduar luftën, duke e kritikuar ashpër Zelenskyn për deklaratën se njohja e Krimesë si pjesë e Rusisë është e papranueshme për Kievin.
Një zëdhënës i kryeministrit britanik Keir Starmer tha se bisedimet përfshinin “takime teknike thelbësore me zyrtarë evropianë, amerikanë dhe ukrainas, mbi mënyrën se si të ndalet lufta” e nisur nga Rusia në vitin 2022.
“Ne mbetemi plotësisht të përkushtuar për të siguruar një paqe të drejtë dhe të qëndrueshme në Ukrainë, dhe këto bisedime sot janë një pjesë e rëndësishme e këtij procesi”, tha zëdhënësi.
Keith Kellogg, i dërguari i Trump për Ukrainën, i vlerësoi bisedimet si pozitive.
Marrë nga Radio Evropa e Lirë
