Nga James Reinl
Presidenti Donald Trump ka ngritur dyshime se pas trazirave në Los Anxhelos qëndrojnë “agjitatorë të paguar”, duke shtuar spekulimet mbi grupet protestuese dhe paratë e errëta nga miliarderë që mund të fshihen pas kaosit në qytetin e dytë më të madh të Amerikës.
Duke folur me gazetarët të martën, Trump i përshkroi disa protestues në Los Anxhelos si “kryengritës, agjitatorë apo shkaktarë trazirash të paguar”, duke sugjeruar se ata financohen nga grupe të fshehta – të cilat ai nuk i përmendi me emër.
Komentet e tij shtuan vëmendjen mbi protestat, të cilat shpërthyen në qendër të Los Anxhelosit të premten, si reagim ndaj bastisjeve federale për emigracionin, dhe u përshkallëzuan në përplasje me forcat e rendit, dëmtim pronash dhe plaçkitje të shfrenuar.
Maskat dhe pajisjet e tjera të mbajtura nga disa protestues, si dhe teknikat e njohura të trazirave – si thyerja e bordurave për të hedhur copa betoni drejt makinave të policisë – kanë ngritur pikëpyetje nëse pas protestave qëndrojnë agjitatorë me përvojë.
Hetues online si Matt Palumbo dhe DataRepublican, si dhe politikanë si kongresistja nga Florida, Anna Paulina Luna, kanë reaguar në rrjete sociale duke përmendur grupet që sipas tyre qëndrojnë pas protestave që çuan në dhunë, dhe burimet financiare që i mbështesin.
Ata përshkruajnë një rrjet lidhjesh midis aktivistëve për të drejtat e emigrantëve dhe grupeve të majta në rrugët e Los Anxhelosit me miliarderë si George Soros, Neville Singham, madje edhe me Partinë Komuniste Kineze.
“Protestat që po shohim nuk janë organike — të zakonshmit po veprojnë sërish,” i tha Daily Mail, Matt Palumbo, autori i librave për Sorosin dhe djalin e tij, Alex Soros.
“Ka një linjë të drejtë financimi që përfshin qeverinë tonë federale, shtetin e Kalifornisë dhe miliarderë që kanë përbuzje për kombin që i mundësoi suksesin e tyre.”
Koalicioni për të Drejtat e Emigrantëve me bazë në Los Anxhelos (CHIRLA) është një tjetër grup që ka luajtur rol në protestat që u shndërruan në përplasje me policinë dhe agjentët federalë.
Hulumtimet e Palumbo-s dhe të tjerëve treguan se CHIRLA mori dhjetëra miliona dollarë gjatë administratës Biden — kryesisht nga shteti i Kalifornisë, por edhe 450.000 dollarë grante nga Departamenti i Sigurisë Kombëtare për të ofruar ‘arsim dhe trajnim për shtetësi.’
Pas kthimit të Trump në Shtëpinë e Bardhë në janar, Departamenti për Sigurinë Kombëtare ndërpreu lidhjet me grupin dhe përfundoi çdo financim tjetër në mars, duke përfshirë edhe rikthimin e rreth 101.000 dollarëve që nuk ishin paguar ende.
Grupi gjithashtu morri më shumë se 500.000 dollarë vetëm në vitin 2023 nga Fondacioni Tides, një organizatë ‘kalimtare’ që Fondacioni për Shoqërinë e Hapur i Sorosit përdor për të financuar kauzat dhe aktivistët progresivë.
Soros ka qenë prej kohësh problem për konservatorët dhe objekt i teorive konspirative, që e paraqesin miliarderin hungarezo-amerikan dhe hebre si një mjeshtër marionetash që ushtron kontroll mbi ekonominë dhe qeveritë globale.
Një përfaqësues i Fondacionit për Shoqërinë e Hapur i tha Daily Mail-it, se organizata nuk ishte e përfshirë në protestat në LA, duke theksuar se grupi nuk “financon, trajnon apo drejton protestuesit” dhe është kundër “gjithë dhunës politike, përfshirë përdorimin e dhunës në protesta.”
“Të gjithë përfituesit dhe partnerët tanë pritet, të respektojnë vlerat tona për jo-dhuna dhe përmbushjen e ligjit,” tha përfaqësuesi.
Një përfaqësues i CHIRLA-s tha se grupi nuk kishte “marrë pjesë, koordinuar apo qenë pjesë e protestave”, në LA dhe kishte qenë i përfshirë vetëm në një ngjarje për shtyp, javën e kaluar.
Marrë nga Daily Mail
