Kërkesat për azil në Bashkimin Europian kanë shënuar rënien më të madhe të pesë viteve të fundit gjatë gjysmës së parë të këtij viti. Sipas të dhënave më të fundit të Agjencisë së Bashkimit Europian për Azilin (EUAA), në 6 muajt e parë janë regjistruar 17% më pak kërkesa krahasuar me të njëjtën periudhë të vitit të kaluar. Rënia vjen në vazhdën e një trendi zbritës që ka nisur që nga viti 2024.
Sipas Agjencisë, kjo ulje lidhet kryesisht me tranzicionin politik në Siri, si dhe me bashkëpunimin më të ngushtë të BE-së me vendet e origjinës dhe ato të tranzitit të emigrantëve. Edhe pse konfliktet në Lindjen e Mesme janë përshkallëzuar, ato nuk kanë sjellë rritje të kërkesave për azil në Evropë.
Franca kryeson listën me 69 mijë kërkesa për azil, e ndjekur nga Italia me 66 mijë, Spanja dhe Gjermania me nga 55 mijë kërkesa secila. Ndërsa për nga numri i kërkesave për frymë, Greqia mban vendin e parë me 23 mijë kërkesa.
Grupi më i madh i aplikantëve janë afganët me 39 mijë aplikime, të ndjekur nga venezuelasit me 33,500 kërkesa dhe bangladeshasit me 19,500 kërkesa. Sa i përket pranimit, vendet me shkallën më të lartë të njohjes së azilit janë Mali me 87%, Haiti me 84% dhe Afganistani me 73% të kërkesave të aprovuara.
Marrë nga Euronews.com
