Persona të paidentifikuar në mëngjes (19.10.2025) kanë hyrë në muzeun e Luvrit në Paris. Ata kanë marrë objekte bizhuteri nga galeria d’Apollon, vuri në dukje ministri i Brendshëm Laurent Nuñez. Këto objekte janë përtej vlerës në treg me “një vlerë të paçmueshme kulturore dhe historike”, tha ministri. Dorasit kanë hyrë nga jashtë me një shkallë transporti dhe më pas janë arratisur. Aksioni ka zgjatur gjithsej shtatë minuta.
Dorasit kanë hyrë nga pjesa anësore e godinës, ku ndërkohë po bëhen punime. Muzeu më i frekuentuar në botë ndërkohë i është nënshtruar një restaurimi kapital.
Ata kanë hyrë direkt në galerinë d’Apollon. Sipas gazetës Le Parisien dorasit kanë thyer xhamin e dritares për të hyrë brenda, ndërsa një person ka bërë roje jashtë. Sipas gazetës ata kanë vjedhur nëntë objekte nga koleksioni i Napoleonit dhe perandoreshës. Ndër to një varëse, një karficë dhe një kurorë. Gjatë mësyrjes së dorasve në muze nuk ka pasur të plagosur, njofton ministrja franceze e Kulturës Rachida Dati.
Gjatë së dielës muzeu i Louvrit do të qendrojë i mbyllur, sepse vazhdojnë hetimet.
Në Louvre rreth nëntë milionë vizitorë në vit
Louvre konsiderohet si një ndër atraksionet më të njohura në botë. Në vitin 2024 muzeu u vizitua nga gati 9 milionë vizitorë. Koleksioni i Louvre përfshin mbi 35.000 vepra arti. Megjithatë në historinë e tij Louvre ka përjetuar disa vjedhje. Ndër to edhe rëmbimin e kryeveprës së Leodardo Da Vinçit Mona Lisa: Portreti i famshëm, piktura e konsideruar më e rëndësishmja në historinë botërore të artit, u rëmbye në vitin 1911 dhe u zhduk prej muzeut. Por dikur Mona Lisa u gjet dhe qysh atëherë josh çdo ditë rreth 20.000 vizitorë në këtë muze.
Marrë nga AFP
