Zelanda e Re do të rrisë taksën hyrëse për turistët e huaj. Kostoja e Taksës Ndërkombëtare të Ruajtjes dhe Turizmit të Vizitorëve do të trefishohet në 100 dollarë neozelandezë nga 35 të tillë nga 1 tetori.
Qeveria thotë se kjo masë do të ndihmojë ndihmuar rritjen ekonomike dhe të “sigurojë që vizitorët të kontribuojnë në shërbimet publike dhe përvojat me cilësi të lartë gjatë vizitës në Zelandën e Re”.
Por Industria e Turizmit Aotearoa – organi i pavarur turistik i vendit – thotë se tarifa më e lartë është një pengesë për vizitorët, duke e bërë atë “tepër të shtrenjtë për t’u vizituar“.
Zelanda e Re është e famshme për kulturën e saj Maori dhe peizazhet me akullnaja, male, vullkane dhe liqene.
Por vendndodhja e saj në Paqësorin Jugor dhe tarifat e lidhura me fluturimet në distanca të gjata shpesh kanë krijuar një pengesë për vizitorët.
“Rimëkëmbja e turizmit të Zelandës së Re po mbetet pas pjesës tjetër të botës dhe kjo do të dëmtojë më tej konkurrencën tonë globale”, tha për BBC Rebecca Ingram, shefja ekzekutive e shoqatës.
Zelanda e Re prezantoi për herë të parë taksën në vitin 2019, pasi u përball me ndikimin e një numri të madh vizitorësh në infrastrukturën, mjedisin dhe komunitetet e saj.
Gjatë pandemisë së koronavirusit, vendi mbylli kufijtë e tij për dy vjet e gjysmë dhe nuk i lejoi vizitorët e huaj të ktheheshin deri në gusht 2022.
Vendi ka qenë duke luftuar për t’u rikthyer në nivelet e vizitorëve që pa para pandemisë, me pak më pak se tre milionë vizitorë ndërkombëtarë në 2023, afërsisht tre të katërtat e niveleve para pandemisë.
Nga taksa e re do të përjashtohen vizitorët nga Australia dhe Paqësori. Shumica e vizitorëve në Zelandën e Re janë nga Australia, Shtetet e Bashkuara, Kina dhe Fixhi.
Zelanda e Re nuk është i vetmi vend ku ekzistojnë taksa turistike.
Vende të tjera që paguajnë turistët përfshijnë Indonezinë, Spanjën, Francën, Austria, Kroacinë, Kosta Rikën, Islandën dhe Italinë.
Në shumicën e vendeve, taksa përfshihet si pjesë e kostove të akomodimit, vizës ose biletave të avionit.
Në prill, Venecia nisi një provë ku udhëtarëve ditorë iu caktua një taksë prej 5 € për të vizituar qytetin në ditët e pikut, në një përpjekje për të luftuar efektet e mbiturizmit.
