Me skemën e re të Garancisë Sovrane nëpërmjet bankave të nivelit të dytë parashikohen të disbursohen 4,3 miliardë lekë apo rreth 44 mln euro kredi me interes të subvencionuar 2%, me qëllim nxitjen e investimeve për 5 sektorë, si: agropërpunimi, agroturizmi, peshkimi, akuakulturën, serra dhe teknologjia bujqësore.
Skema e re e Garancisë Sovrane është një nismë shtetërore që u mundëson fermerëve dhe bizneseve të sektorit të bujqësisë të marrin kredi me interes 2%, ku 70% e shumës së kredisë do të garantohet nga shteti. Shuma e kredisë e përfituar nga aplikuesit nuk do të kalojë nivelin e 25 mln lekëve.
Ministri i Financave, Petrit Malaj, bëri të ditur detajet e skemës. Sipas tij në total do të alokohen 4,3 mld lekë fonde kredie, ku 3 mld lekë do të mbulohen nga shteti. Prej këtyre fondeve, 1 mld lekë fonde u shtuan rishtaz, pas ndryshimeve të miratuara në buxhetin e shtetit, ndërsa 2 mld lekë fonde ishin të pashfrytëzuara nga garancia e mëparshme sovrane.
“Alokimi do të bëhet nga bankat e nivelit të dytë tregtare, duke mbuluar 70% të principalit të kredive, skemë e cila do të mundësojë kreditimin e fermerëve dhe Ndërmarrjeve të Vogla dhe të Mesme në sektorin e bujqësisë deri në vlerën 4,3 miliardë lekë”.
Skema ofron kredi me interes të ulët, të cilat jepen nga bankat tregtare, ndërsa 70% e principalit të huasë garantohet nga shteti përmes Garancisë Sovrane. Në kombinim me instrumente të Bankës së Shqipërisë, interesi do të kufizohet në vetëm 2%, duke e bërë këtë skemë të favorshme për kreditimin e bujqësinë.
“Kjo skemë garancie synon të adresojë problematikën e mungesës së kolateralit, e cila kufizon ndjeshëm aksesin në financimin e sektorit të bujqësisë, si dhe do të mbështesë financimin me kosto të ulët”, u shpreh ministri Malaj.
Skema përfshin mbështetje për aplikues në këta sektorë: Sera dhe kultivimi në mjedise të mbrojtura; Agropërpunimi dhe rritja e kapaciteteve prodhuese; Peshkimi dhe përpunimi i prodhimeve detare; Akuakultura; Agroturizmi dhe Inovacioni dhe modernizimi teknologjik në bujqësi.
Mjetet financiare që merren përmes kësaj skeme duhet të përdoren për investime, si: Blerje makinerish dhe pajisjesh moderne bujqësore. Ndërtim ose zgjerim të serave dhe infrastrukturës përpunuese. Projekte në agroturizëm që rrisin kapacitetin pritës dhe promovojnë prodhimet vendase. Investime në teknologji digjitale dhe inovative për rritje efikasiteti në prodhim.
Marrë nga Monitor
