Rritja e menjëhershme e çmimit të naftës ka goditur rëndë sektorin e bujqësisë. Efektin e kanë ndjerë të parët, fermerët e vegjël në Divjakë dhe Fier, të cilët nuk kanë mundësi të blejnë naftën për plugimin dhe frezimin e tokës.
“Plugimi ka vajtur 20 mijë lek/dynym, ka qenë 17 mijë. Freza 18 mijë/dynym. Naften e mora me 214 lek/liter për zetorin”, tha Ruzhdi Veliu, fermer në Divjake.
“Naftën e blej 214 lek/liter. Lakra e kuqe është tharë në zetor se nuk shitet. Është rritur kosto shumë dhe çmimet e perimeve mbeten të uleta”, shprehet fermeri tjetër Thoma Dhori.
Fermerët e vegjël thonë se nuk përfitojnë nga skema e subvencionit, pasi shteti jep naften pa akcize vetëm për ata që kanë mbi 1 hektar tokë.
“Subvencionin e naftës e marr vetëm për tokën time 1.5 ha por kam dhe 40 ha tokë me qira por nuk marr subvencion sepse nuk kam certifikatat e tokave që kam marrë me qera dhe unë dal me minus. Kjo për mua nuk është ndihmë; bujqësia ka vajtur në zero”, shprehet Vilson Sika, fermer ne Fier.
Por rritja e çmimit të naftës nuk është problemi i vetëm për fermerët. Paralelisht ata po përballen me rritje dyshifrore edhe të çmimeve për plehrat kimikë dhe inputet e tjera bujqësore.
Ngushtica e Hormuzit, e bllokuar në mënyrë efektive nga Teherani, mbart rreth 30% të plehrave të tregtuara globalisht dhe prodhuesit e Gjirit janë furnizues të mëdhenj të amoniakut dhe uresë, sipas Organizatës së Ushqimit dhe Bujqësisë të OKB-së.
Banka e Amerikës paralajmëron se konflikti kërcënon 65% deri në 70% të furnizimeve globale të uresë, dhe çmimet tashmë janë rritur me 30% deri në 40%.
Ndryshe nga karburanti, plehrat nuk kanë rezerva strategjike. Megjithatë disa vende janë më të ekspozuara se të tjerat.
Në tregun shqiptar çmimet e plehrave kimikë janë rritur sakaq me 30 për qind krahasuar me fillimin e luftës në Iran, ndërkohë që rritja pritet të vazhdojë. Kjo do të godasë edhe më shumë prodhimin e rrënuar vendas, teksa fermerët janë sakaq në vështirësi të mëdha ekonomike dhe të goditur nga kostot e larta të prodhimit.
Marrë nga Kapitali.al
