Sipas vrojtimit të publikuar nga Banka e Shqipërisë, treguesi i ndjesisë ekonomike (TNE) u ul me 1.5 pikë gjatë prillit, megjithëse vijon të qëndrojë mbi mesataren historike me rreth 6.4 pikë .
Rënia e treguesit u ndikua kryesisht nga përkeqësimi i besimit në sektorin e shërbimeve dhe tregtisë, si dhe nga një tkurrje e ndjeshme e besimit të konsumatorëve. Në të kundërt, sektori i industrisë dhe ai i ndërtimit shënuan përmirësim, duke amortizuar pjesërisht rënien e përgjithshme.
Në sektorin industrial, besimi u rrit me 1.5 pikë përqindje, i mbështetur nga pritje më optimiste për prodhimin dhe porositë nga eksportet. Edhe ndërtimi shënoi një rritje më të fortë, me 4.9 pikë përqindje, i ndikuar nga përmirësimi i porosive aktuale .
Në të kundërt, shërbimet dhe tregtia raportuan rënie të besimit. Në sektorin e shërbimeve, bizneset dhanë vlerësime më të ulëta për kërkesën dhe aktivitetin aktual, ndërsa në tregti pesimizmi lidhet kryesisht me ecurinë e shitjeve.
Rënia më e fortë u regjistrua te konsumatorët. Treguesi i besimit konsumator u ul me 3.2 pikë përqindje, duke zbritur nën mesataren historike. Sipas të dhënave, konsumatorët janë më pesimistë për situatën e tyre financiare, për ekonominë në të ardhmen dhe për mundësinë e kryerjes së blerjeve të mëdha .
Të dhënat sugjerojnë një klimë ekonomike të përzier, ku bizneset prodhuese dhe ndërtimi shfaqin rezistencë, ndërsa kërkesa e brendshme dhe pritjet e konsumatorëve mbeten të dobëta, duke sinjalizuar rreziqe për ecurinë e ekonomisë në muajt në vijim.
Marrë nga Report.al
