Bordi i Transparencës vendosi këtë të martë rritjen e çmimit të naftës me 4 lekë për litër, duke e çuar tavanin e shitjes me pakicë në 201 lekë/litër. Vendimi hyn në fuqi sot, më 13 maj, në orën 18:00 dhe do të mbetet në fuqi deri në mbledhjen e ardhshme të bordit.
Sipas vendimit të publikuar, çmimi i shitjes me shumicë për gazoilin do të jetë jo më shumë se 189 lekë/litër.
Ndërkohë, për benzinën, Bordi ka përcaktuar çmimin maksimal të shitjes me pakicë në 187 lekë/litër, ndërsa çmimi me shumicë do të jetë jo më shumë se 175 lekë/litër.
Në njoftimin zyrtar, autoritetet paralajmërojnë operatorët e tregut për detyrimin e zbatimit të këtij vendimi, duke theksuar se çdo shkelje e konstatuar do të pasohet me pezullim të aktivitetit.
“Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar të mbrojnë interesat e konsumatorëve shqiptarë dhe ruajtjen e parimeve të konkurrencës së ndershme në treg”, thuhet në deklaratë.
Bordi dha edhe një sqarim lidhur me skemën e akcizës së reduktuar, të parashikuar në Aktin Normativ nr. 1, datë 3 prill 2026. Sipas këtij akti, ulja e akcizës në nivelin 80% zbatohet vetëm në rastet kur çmimi i gazoilit tejkalon 220 lekë/litër ose benzina kalon 200 lekë/litër.
Meqenëse çmimet e reja të vendosura janë nën këto kufij, akciza për karburantet do të vijojë të aplikohet në nivel të plotë, pra 100%.
Marrë nga Ekofin.al
