Numri i turistëve turq në Greqi është rritur, që kur Greqia nisi zbatimin e marrjes së vizave turistike pas mbërritjes në aeroport, për vizitorët nga shteti fqinj.
Turqia po përjeton rënie të konsiderueshme në turizëm – me hotele të mbetura bosh pasi pushuesit dynden në Greqi.
Më 1 prill 2024, Greqia prezantoi programin e vizave në mbërritje për vizitorët turq. Sipas kësaj skeme, shtetasit turq mund të vizitojnë dhjetë ishuj grekë dhe të qëndrojnë deri në shtatë ditë me një vizë ekspres me një hyrje.
Kjo lëvizje ka çuar në një rritje të numrit të turistëve turq, që vizitojnë Greqinë, duke lënë shumë dhoma hotelesh bosh në resortet turke, siç raportohet nga VisaGuide.
Vetëm në dhjetë ditët e para të prillit, ishujt si Lesvos, Kios, Samos, Kos dhe Rodos pritën 20,690 turistë turq. Situata ka ngjallur shqetësim tek përfaqësuesit e turizmit në Turqi, ku disa kanë kërkuar anulimin e vizave ekspres.
Rënia e turizmit ka detyruar resortet turke si Bodrumi të ulin çmimet deri në 50 % nga gjysma e dytë e korrikut dhe dy javët e para të gushtit, në një përpjekje për të tërhequr vizitorë.
Demir, Kryetari i Bordit Rajonal të Përfaqësimit TURSAB, u shpreh: “Meqenëse kostot fikse, si energjia elektrike, personeli dhe qiratë e hoteleve, janë të pandryshueshme, ndërsa kostot e tjera të ushqimit, pijeve dhe pastrimit janë të ndryshueshme, kolegët tanë hotelierë bënë llogaritjet e tyre dhe bënë zbritje, në mënyrë që të paktën dhomat të mos mbeten bosh, ata mund të paguajnë stafin dhe të mos i pushojnë nga puna.
“Në vitin 2023, Greqia pati 33 milionë turistë, pesë milionë më shumë se një vit më parë, sipas shifrave nga Organizata Kombëtare Greke e Turizmit (GNTO), duke e katapultuar atë në dhjetë vendet më të vizituara në botë.
Vetëm Athina priti mbi shtatë milionë vizitorë vitin e kaluar dhe numri pritet të rritet me 20 % në vitin aktual.
Ky bum turistik, ndonëse një ndihmë për ekonominë e Greqisë, ka nxitur një krizë të rëndë strehimi në Athinë dhe ka ushtruar presion te qytetet. Grilat e dyqaneve athinase janë ‘zbukuruar’ me mbishkrime: “Jo më turizëm”.
Marrë nga The Mirror
