Kryeministri Edi Rama, është shprehur me anë të një postimi në rrjetet sociale se Shqipëria nga një vrimë e zezë në mes të Europës, që ishte në vitin 2013, gjatë qeverises së tij është kthyer në një nga prodhuesit më të mëdhenj të energjisë diellore në rajon.
Një ditë pas vendimit të Entit Rrregullator për uljen e çmimit të energjisë me 1 lekë për konsumatorët familjarë, Rama thotë se për herë të parë u vendos ulja e parë në 35 vjet. Ai shton se sot Shqipëria ka shërbime të digjitalizuara dhe me një volum investimesh në vazhdim, që sipas tij, do të na japin pavarësinë e plotë energjetike brenda mandatit të katërt.
POSTIMI:
“MIRËMËNGJES dhe me këtë videokartolinë të transformimit epokal në sektorin energjitik prej vitit 2013, kur Shqipëria ishte vrimë e zezë në mes të Europës me vjedhjet e humbjet katastrofike të energjisë, radhët e gjata të gjysmës së popullit për të paguar faturat edhe për gjysmën që s’paguante, lëvizjet skandaloze të çmimit e zhurmat e gjeneratorëve nëpër rrugë, e deri sot kur jemi prodhuesit më të mëdhenj të energjisë diellore në rajon, kemi shërbime të digjitalizuara e një volum investimesh në vazhdim që do të na japin pavarësinë e plotë energjetike brenda mandatit të katërt, ndërkohë që kemi vendosur uljen e parë në 35 vjet të çmimit për konsumatorët familjarë, nga e cila përfitojnë mbi 1 milionë abonentë, ju uroj një ditë të mbarë”, shkruan Rama.
