Furnizimet e para komerciale me gaz natyror për qytetin e Korçës pritet të nisin deri në fund të vitit 2026, në kuadër të projektit të gazifikimit që po zhvillohet nga kompania shtetërore azerbajxhanase SOCAR në Shqipëri.
Lajmi është bërë i ditur nga drejtori ekzekutiv i SOCAR për Ballkanin, Murad Heydarov, i cili theksoi se projekti pilot NUR për gazifikimin e Korçës është tashmë në fazën e studimeve teknike dhe përgatitjes së projektit.
Në një intervistë për Trend.az, ai tha se kompania ka nisur punimet për projektimin teknik të detajuar të rrjetit të shpërndarjes së gazit në qytet. Këto punime pritet të përfundojnë deri në fund të këtij viti, duke hapur rrugën për nisjen e fazës së furnizimit, transmeton skyweb.al.
Paralelisht me ndërtimin e rrjetit të shpërndarjes, SOCAR Gas Albania po zhvillon studime teknike dhe tregtare për të parë mundësinë e furnizimit të Korçës me gaz natyror të kompresuar.
Kjo zgjidhje do të mundësonte nisjen e furnizimit me gaz edhe përpara përfundimit të rrjetit të plotë të shpërndarjes.
Projekti është prezantuar më herët në një dëgjesë publike në Korçë ku morën pjesë kryeministri Edi Rama dhe ministri i energjisë i Azerbajxhanit, Parviz Shahbazov.
Për realizimin e investimit është përgatitur edhe draft marrëveshja mes qeverisë shqiptare dhe SOCAR, e cila do të shërbejë si bazë për zhvillimin e projektit të gazifikimit.
Në fazën fillestare, projekti është i fokusuar vetëm në Korçë.
Megjithatë, kompania nuk përjashton mundësinë që në fazat e ardhshme gazifikimi të zgjerohet edhe në zona të tjera pranë qytetit.
Projekti konsiderohet si hapi i parë konkret drejt krijimit të një infrastrukture të gazit në Shqipëri, një sektor që deri tani ka mbetur i pazhvilluar pavarësisht kalimit të gazsjellësit TAP në territorin e vendit.
Marrë nga Skyweb.al
