Qindra banorë, përfaqësues të autoriteteve lokale dhe biznesmenë nga Ulqini protestuan në këtë qytet në jug të Malit të Zi, duke thënë se “Ulqini nuk është në shitje”.
Protesta në Ulqin u mbajt pavarësisht nga fakti se kryeministri i Malit të Zi, Millojko Spajiç, më 20 mars njoftoi se “Eagle Hills” ka ndërmend të tërhiqet dhe t’ua kalojë plazhet qiramarrësve lokalë.
Kompania arabe, më 11 mars dorëzoi ofertën më të mirë për dhënien me qira për një periudhë katërvjeçare të nëntë nga 19 plazhet në Plazhin e Madh të Ulqinit.
Pas kësaj, siç e ka bërë të ditur kryeministri Spajiç, presidenti i kompanisë arabe, Mohamed Alabar, ka hequr dorë nga oferta.
Ish-kryeministri Dritan Abazoviç, i cili është nga Ulqini, ka kërkuar që Prokuroria Speciale e shtetit të hetojë rastin e dhënies së qirasë për Plazhin e Madh, duke pretenduar se bëhet fjalë për një vepër korruptive.
Marrë nga Rdio Evropa e Lirë
