Një dosje hetimore që mban Nr. 49, e mbërritur nga Prokuroria e Bergamos (Itali) në adresë të Prokurorisë së Posaçme SPAK, ka rezultuar një dështim total i përfaqësimit të akuzës në gjykatë, pasi kjo e fundit ka pushuar akuzën e “Grupit të strukturuar kriminal”, ”Kryerja e veprave penale në kuadër të grupit kriminal”, duke nxjerrë të pafajshëm 11 personat e akuzuar nga SPAK.
Për gati tre vite, 11 personat kanë qëndruar të izoluar në burg, duke u përndjekur nga SPAK, me hetime dhe sekuestrim pasurie.
Ndërsa dje, në 16 Tetor 2024, gjyqtarët Rudina Palloj, Elsa Ulliri dhe Esmeralda Xhili, rrëzuan pretencën e Prokurorisë së Posaçme dhe liruar, jo vetëm të arrestuarit nga burgu por dhe pasuritë e sekuestruara të tyre.
Për 8 nga personat e arrestuar si Saimir Prenga, Gjergji Luli, Alfred Luli, Ilir Duro, Francesko Çeçi, Lorik Prengaj alias Fabio Prengaj dhe Gjergj Zefi, gjykata ka urdhëruar dje lirimin e menjëhershëm, duke i pushuar akuzat e rënda të ngritura nga SPAK.
Gjithashtu 3 gjyqtarët e GJKKO-së, kanë deklaruar të pafajshëm për “Grup të strukturuar kriminal” dhe 4 të pandehurit e tjerë të arrestuar dhe akuzuar nga SPAK si Braniol Liço, Florind Vukaj, Lulëzim Selimi dhe Dhimitër Nina.
Sipas vendimit të shpallur ditën e djeshme këta të fundit janë deklaruar fajtor vetëm për akuzën e “Prodhim dhe shitje të narkotikëve” kryer në bashkëpunim, duke u dënuar me 4 vjet e 8 muaj burgim secili.
Ndërkohë për këta persona SPAK në pretencën e tij kishte kërkuar dënimin me 12 dhe 11 vjet burgim.
Pak muaj më parë SPAK, ka marrë të pandehur dhe dërguar në gjyq 11 persona, si të dyshuar në tregtinë e drogës në Itali.
Braniol Liço alias Branjol Liço alias Branjol Ago, Florid Vukaj, Lulëzim Selimi, Dhimitër Nina, Saimir Prenga, Gjergji Luli, Alfred Luli, Ilir Duro, Francesko Çeçi, Lorik Prengaj alias Fabio Prengaj dhe Gjergj Zefi, akuzoheshin nga SPAK si pjesëmarrës në një grup kriminal që tregtonte kokainë në Itali.
Por për episodet e hetuara nga autoritet Italiane, këta persona ishin dënuar në Itali për trafik droge mes dy vendeve, ndërsa në Shqipëri, SPAK kishte nisur një dosje të dytë paralele, duke nxjerrë masa sigurimi “arrest në burg” ndaj tyre dhe sekuestruar dhjetëra pasuri në Shqipëri.
Tashmë të gjitha akuzat e ngritura ndaj tyre u pushuan duke sjellë lirimin e menjëhershëm të 8 personave, ndërsa 4 të tjerë u dënuar për akuza të tjera siç është “Prodhimi dhe shitja e narkotikëve”.
Ndërkaq pritet që pas zbardhjes së vendimit prokuroria e posaçme SPAK të veprojë me apelim.
VENDIMI I PAFAJËSISË SË GJYKATËS
- Braniol Liço – Pafajësi
- Florid Vukaj – Pafajësi
- Lulëzim Selimi – Pafajësi
- Dhimitër Nina – Pafajësi
- Saimir Prenga – Pafajësi
- Gjergji Luli – Pafajësi
- Alfred Luli – Pafajësi
- Ilir Duro – Pafajësi
- Francesko Çeçi – Pafajësi
- Lorik Prengaj – Pafajësi
- Gjergj Zefi – Pafajësi
VENDIMI I DËNIMIT PJESËRISHT I GJYKATËS
Braniol Liço dënuar 4.8 vite burgim.
Florind Vukaj dënuar me 4.8 vite burgim.
Lulëzim Selimi dënuar me 4.8 vite burgim.
Dhimitër Nina dënuar me 4.8 vite burgim.
Marrë nga Ora News
