Tenderi i shumë diskutuar për të marrë makina me qira për Policinë e Shtetit është finalizuar ditët e fundit, duke u shpallur edhe fituesit e një procedure tepër të dyshimtë.
Sipas dokumenteve që disponon VoxNews, Operatori i Blerjeve të Përqendruara, me kërkesë të Policisë së Shtetit, do të lidhë ditët në vijim kontratat e makinave me dy firmat fituese.
Nga një kalkulim që bëri redaksia jonë rezulton se 1 makinë sedan, e ulët, do të merret me qira për 4 vite me një çmim rreth 33 mijë euro. Ndërkohë, 1 automjet SUV, tip foristrade, do të merret me qira po për 4 vite nga Policia e Shtetit me një çmim prej 33 mijë e 500 euro.
Në dokumente parashikohet se do të ketë edhe një tavan kilometrash që mund të bëjë policia, çka ka sjellë që i gjithë tenderi të vihet shumë në diskutim nëse policia duhet t’i blejë apo t’i marrë me qira. Kontratat e mëparshme kanë qenë gjithmonë të diskutuara për vlerën dhe llojin e makinës, teksa gjithmonë ka pasur debate të tilla, për shkak edhe të situatave ku mjete të policisë kanë mbetur në rrugë.
Dokumenti i mësipërm është njoftimi i fituesit për mjete Sedan, ku fitues doli firma “EUROCAR RENTALS”. Kjo firmë konkurroi në lotin 1 të tenderit me objekt “marrje autovetura SEDAN me qira për Policinë e Shtetit”, me fond limit 222 milionë lekë.
Kompania “ALBANIA MOTOR COMPANY” ofroi 171 milionë lekë, ndërkohë fituesit ofruan 198 milionë lekë. Sipas dokumenteve shoqëruese, Policia e Shtetit kërkoi 60 mjete të tilla Sedan. Nëse do të bëjmë një llogari të thjeshtë rezulton se 1 mjet do të merret me qira me vlerën e 3.312.000 lekë, ose mbi 33 mijë euro. Oferta e fituesit nuk ka qenë më e ulta, por firma që ofroi më pak u skualifikua për shkak se “s’kishte shërbimet e ngjashme në tre vitet e fundit të aktivitetit”.
Në të njëjtën kohë, OBP ka shpallur fituesin edhe të lotit 2 për marrjen me qira të makinave për Policinë e Shtetit, me objekt “marrje autovetura SUV me qira për Policinë e Shtetit”, me fond limit në vlerën 227,800,627.
Oferta më e ulët ka qenë sërish e kompanisë “ALBANIA MOTOR COMPANY” me vlerë 171 milionë lekë. “MEKTRIN” ofroi 201 milionë lekë. Policia shkruan se do të marrë 60 makina me qira për 4 vite SUV. Me një kalkulim rezulton se 1 makinë e tillë do t’i kushtojë arkave të shtetit shqiptar 3.350.400 lekë, ose rreth 34 mijë euro.
Ofertë më të ulët se fituesi pati edhe “PORSCHE LEASING” me vlerë 194 milionë lekë, por të dyja ato që ofruan më pak u skualifikuan. “PORSCHE” për shkak se nuk ka plotësuar informacionin se kush janë personat aksionerë ose ortakë. Ndërkohë, që firma “ALBANIA MOTOR COMPANY” “s’ka punë të ngjashme”.
Në dokumentet shoqëruese janë disa klauzola, ku rezulton se mjetet do të merren në përdorim të qiramarrësit për 4 vjet me një planifikim vjetor mesatar 32.500 km për grup mjetesh ose shfrytëzim mesatar prej 130.000 km për 4 vjet po për grup mjetesh”. Mjetet do të merren në përdorim për Policinë e Shtetit për një afat 4 vjeçar, ndërkohë që pas përfundimit të këtij afati, këto mjete do t’i dërgohen firmës që do të shpallet fituese e tenderit.
Marrë nga VoxNews.al
