Në shkurt të vitit 2015, në Drejtorinë e Përgjithshme të Doganave mbërriti një video nga Dogana e Kakavijës. Pamjet tregonin dy kamionë me cigare, që hynin lirshëm kontrabandë në territorin e Shqipërisë. Gjatë paradës së kontrabandës, në doganën e Kakavijës ishin në shërbim 5 punonjës. Këta ishin 4 doganierë dhe përgjegjësi i turnit, Klodian Çani.
Pas videos së rëndë të mbëritur nga kamerat e zyrës doganore të Kakavijës, Drejtoria e Përgjithshme e Doganave vendosi pezullimin e menjëhershëm të çanit nga detyra. Ndërkohë Departamenti Operativ Hetimor i Drejtorisë së Përgjithshme të Doganave i kallëzoi të pesë doganierët në prokurorinë e Gjirokastrës.
Por Klodian Çani ishte i fortë. Prokuroria nuk e mori asnjëherë nën hetim, por thjesht u mjaftua duke e pyetur si person në dijeni. Dhe shefi i turnit u tha prokurorëve se ai nuk ka qenë në dijeni të kalimit të mjeteve dhe se nuk ishte njoftuar nga ndonjë doganier.
Megjithatë, drejtoresha e atëhershme e Doganave, Irena Beqiraj, vendosi largimin nga puna të Çanit për shkelje administrative. Largimi i doganierit nga Gjirokastra ishte një çështje që shkaktoi jo pak përplasje mes ish drejtoreshës së doganave Beqiraj dhe ish ministrit të Financave, Arben Ahmetaj. Kjo pasi Çani cilësohej si një aset i rëndësishëm i Partisë Socialiste në rrethin jugor.
Paralelisht, brenda 6 muajve, ai arriti të shfuqizonte largimin e tij nga puna në Gjykatën Administrative të Tiranës. Si rezultat, 3 vite më vone doganieri i skandaleve u rikthye sërish në doganë. Madje këtë herë shumë më fuqishëm.
Me pak fjalë, Klodian Çani u emërua drejtori faktik i antikontrabandës në Drejtorinë e Përgjithshme të Doganave edhe pse kishte një CV të mbushur plot me skandale, të cilat vetëm shtoheshin.
Në 27 gusht të vitit 2021, drejtori i Informacionit të Doganës Shqiptare u arrestua në Greqi nga prokuroria helene, si kreu i një bande që vidhte bankomatet e bankave. Zoti Çani qëndroi për disa ditë në burg dhe më pas u lirua me kusht duke paguar dhe garanci financiare.
Arrestimi i një zyrtari kaq të lartë të Doganave si kreu i një grupi hajdutësh do të përbente skandal në çdo vend, përfshirë ato të botës së tretë. Por në Shqipëri, Klodian Çani u rikthye sërish në vendin e tij të punës. Këtë herë falë lidhjeve të forta që kishte krijuar me Gent Gazhelin, drejtorin më jetëgjatë të doganave shqiptare, i cili në qarqet e ngushta njihet me nofkën “Çorapja” i Partisë.
Që nga emërimi i Gazhelit në krye të doganave dhe Çanit de facto në krye të antikontrabandës, doganat shqiptare janë përfshirë në jo pak skandale, deri në kontrabandimin e lëndëve toksike. Dhe me një CV kaq të pasur, drejtori faktik i Antikontrabandës, nuk kishte si të mos binte në rrjetën e SPAK.
Emri i Klodian Çanit del në disa hetime të fundit për transferta të paligjshme parash në Greqi, përmes një agjencie doganore që zyrtari i lartë zotëron në Pire.
Këto para dyshohet se janë transferuar për blerjen e votave të emigrantëve shqiptarë në Greqi gjatë zgjedhjeve të fundit, por edhe për llogari të zyrtarëve të lartë, të cilët fshehin paratë e korrupsionit jashtë.
Marrë nga Kapitali.al
