Ndonjëherë mjafton një postim në Instagram, një foto e zgjedhur me kujdes dhe pak dramatizim për të krijuar një “skandal”. Pastaj, nëse historia bie në duart e medias së duhur, ajo mund të marrë përmasa shumë më të mëdha sesa vetë ngjarja.
Kështu ndodhi edhe me historinë e një xhudisteje lituaneze gjatë Kampionatit Evropian të Universiteteve në Tiranë.
Marta Navickait? zgjodhi rrjetet sociale për të shprehur pakënaqësinë e saj për kushtet e akomodimit. Problemi është se, sa më shumë që historia kontrollohet, aq më shumë fillojnë të dalin në pah kontradiktat mes asaj që u tregua dhe asaj që rezulton të ketë ndodhur. Dhe në fund, “skandali” mbetet shumë më i vogël se zhurma që u krijua rreth tij.
Në vend që të mbahet mend për rezultatet në tatami, emri i xhudistes lituaneze u bë i njohur në Tiranë për një seri postimesh në rrjetet sociale. Në fokus ishin disa ambiente të paraqitura si të papastra dhe një kavanoz kos, për të cilin pretendohej se ishte i prishur. Një mënyrë e sigurt për të tërhequr vëmendje.
Sepse një medalje, një rezultat apo një paraqitje sportive kërkojnë punë dhe rezultate. Një video me titullin “shikoni çfarë na kanë dhënë të hamë” mjafton për disa mijëra shikime. Dhe kështu, një kampionat universitar përfundoi duke u kthyer për të në një histori të rrjeteve sociale.
“Kosi i prishur” që doli të ishte…
Një nga momentet më të zhurmshme ishte kavanozi i kosit. Në videon e publikuar, produkti interpretohet si i prishur. Pamja e tij dhe ngjyra përdoren si argument për kushtet e këqija të ushqimit. Por pamjet e tjera tregojnë se bëhet fjalë për kos të shoqëruar me një paketë të veçantë reçeli frutash që përzihet nga konsumatori. Pra, “prova” e një produkti të prishur kishte një shpjegim shumë më të thjeshtë. Ishte kos me reçel.
Një detaj që e kthen një pjesë të rëndësishme të historisë nga “skandal ushqimor” në një keqinterpretim që u përdor për ta bërë situatën të dukej shumë më dramatike.
Pastaj hyri në lojë “propaganda serbe”
Deri këtu mund të flitej për një postim individual dhe për mënyrën se si një sportiste zgjodhi ta paraqiste eksperiencën e saj. Por historia mori tjetër përmasë kur u kap nga media serbe.
“Kurir” e publikoi historinë duke e përcjellë narrativën e kushteve të këqija në Tiranë. Dhe pikërisht këtu duket qartë një tjetër element i kësaj historie: dëshira për ta interpretuar një episod individual në mënyrën më negative të mundshme për Shqipërinë.
Një postim në Instagram u kthye në “histori” për kushtet në Shqipëri. Pa shumë nevojë për kontekst. Pa shumë interes për versionin tjetër. Mjaftonte që historia ishte negative, vinte nga një sportiste e huaj dhe lidhej me Shqipërinë.
Fotot e manipuluara
Por edhe pjesa e fotove të ambienteve nis të mos qëndrojë kur vendoset përballë dëshmive të drejtuesve të konvikteve. Drejtori Olsi Shahini, në një bisedë me gazetarin e Top Channel, Endi Tufa, ka sqaruar se disa nga fotot e përdorura si dëshmi për kushtet e këqija nuk ishin realizuar në dhomat ku ishin akomoduar sportistët. Sipas tij, disa sportiste kishin hyrë në një pjesë të godinës që ishte jashtë funksionit dhe kishin fotografuar ato ambiente.
Ndërkohë, dhomat ku ishin vendosur delegacionet në konviktet e Universitetit Bujqësor të Kamzës dhe Universitetit Ekonomik ishin ambiente të përgatitura dhe të mobiluara për kampionatin. Pra, edhe këtu historia fillon të marrë një tjetër ngjyrë.
Një godinë jashtë funksionit nuk mund të përdoret lehtësisht si fotografia e akomodimit të një delegacioni.
Dhe pastaj mbërrijnë pamjet pas largimit
Por ndoshta momenti më ironik i gjithë historisë vjen kur sportistët largohen. Pamjet e dhomave pas qëndrimit të tyre tregojnë shishe uji të lëna në dysheme, gota kafeje mbi shtretër, çarçafë të grumbulluar, mbeturina dhe bidona plastikë. Por jo vetëm kaq.
Në ambientet e lëna pas shfaqen edhe shishe alkooli, krahas kafesë, ujit dhe mbetjeve të tjera. Nuk është ky një argument për të thënë se të gjithë sportistët janë të papërgjegjshëm.
As nuk mund të pretendohet se çdo dhomë është lënë në të njëjtën gjendje. Por kontrasti është i pamohueshëm.
Një skandal që u kthye në bumerang
Nga fotot e sajuara për të krijuar një realitet që nuk ishte, te media serbe që nxitoi t’i vishte petkun e “skandalit”, historia përfundoi duke i lënë të dyja palët me gisht në gojë.
Ajo kërkoi “like”, ata kërkuan sensacionin. Por në fund, faktet ua prishën të dyve festën.
Marrë nga Top Channel
