Organizatat Euroconsumers dhe Football Supporters Europe i janë drejtuar Komisionit Evropian duke e akuzuar FIFA-n për abuzim me monopolin në shitjen e biletave.
Sipas ankesës, FIFA po shkel nenin 102 të Traktatit për Funksionimin e Bashkimit Evropian, i cili ndalon abuzimin me pozitën dominuese në treg. Zëdhënësja e Euroconsumers, Romane Armangau, deklaroi se FIFA ka kontroll të plotë mbi shitjen e biletave dhe po e përdor këtë fuqi për të vendosur çmime shumë të larta dhe kushte të padrejta për tifozët.
Organizatat pretendojnë se mungon transparenca për kategoritë e biletave dhe shpërndarjen e vendeve, ndërsa sistemi i “çmimeve të ndryshueshme” rrit çmimet me kalimin e kohës. Gjithashtu, theksohet se biletat e reklamuara nga 60 dollarë janë shumë të kufizuara, duke krijuar një perceptim të rremë për përballueshmërinë.
Sipas tyre, pjesëmarrja në Kupën e Botës 2026 është bërë e papërballueshme për shumicën e tifozëve, me biletat për finalen që nisin nga mbi 4,000 dollarë. Për më tepër, tifozët përballen edhe me tarifa shtesë, si rreth 15% për rishitjen e biletave.
Ankesa vjen në një moment kur presioni ndaj FIFA-s po rritet në Bruksel. Komisioneri evropian për sportin, Glenn Micallef, ka ngritur shqetësime edhe për sigurinë e tifozëve gjatë turneut të vitit 2026.
Euroconsumers dhe partnerët e saj i kërkojnë Komisionit Evropian të ndërhyjë urgjentisht, duke vendosur kufizime çmimesh dhe duke rritur transparencën në shitjen e biletave, pasi dëmi ndaj tifozëve mund të jetë i pakthyeshëm sapo ndeshjet të zhvillohen.
Marrë nga Euronews.com
