Kryetari i Bashkisë së Belshit, socialisti Arif Tafani, thotë se nuk e ka fare idenë se përse kompania “Vëllezërit Hysa” po hidhte asfalt elektoral në fshatin Trojas, vetëm pak ditë para zgjedhjeve parlamentare të 11 Majit 2025.
Sipas tij, Bashkia nuk ka miratuar rikonstruksion të asaj rruge rurale dhe as nuk ka bërë pagesë për shoqërinë ndërtimore për këtë projekt.
Tafani është pyetur në Prokurorinë e Elbasanit në 9 Maj, në kuadër hetimeve të nisura pas denoncimit publik që kreu ish-kandidati i opozitës në zgjedhje, Dritan Cani.
Por, kryebashiaku, Arif Tafani nuk e ka ditur një fakt të tillë. Të paktën këtë pretendon ai, pa dhënë ndonjë arsye se përse “Vëllezërit Hysa” po shpenzonin paratë e tyre për të krijuar idenë se Bashkia e Belshit ishte në krye të punëve.
Tafani, në deklarimin e tij në prokurori, të lexuar nga “Boldnews.al”, thotë se “rruga ‘Trojas’ nuk përfshihet në listën e fshatrave të kësaj kontrate. Unë nuk kam dijeni nëse janë kryer punime apo jo. Bashkia Belsh nuk ka projekt për ndërtimin e kësaj rruge dhe nuk është planifikuar në kontratën me subjektin “Vëllezërit Hysa” të vitit 2024, dhe aq më pak të paguhet një segment jashtë kontrate”.
Interesante në deklarimet e Tafanit dhe personave të tjerë të Bashkisë së Belshit është fakti që, asnjë prej tyre nuk e dinte se “Vëllezërit Hysa” po shtronin rrugën në fshatin Trojas. Ndërkohë, personat përgjegjës të kompanisë i janë shmangur drejtësisë dhe nuk është arritur të pyete se përse vendosën këtë “dhuratë” Bashkisë së Belshit.
Transferimi i punimeve
Pas regjistrimit të denoncimit publik, oficerët e Policisë Gjyqësore të Prokurorisë së Elbasanit kqyrën vendin e ngjarjes. Rezultoi se rruga “Shkëndie”, me gjatësi rreth 1 kilometër, ishte e asfaltuar së fundmi. Gjithashtu, është bërë dhe këqyrja e rrugës “Trojas”, një gjatësi prej 131 metra dhe gjerësi prej 3.5-4.5 metra, kjo rruge ishte e shtruar me çakëll dhe sipër saj ishte hedhur lëndë zifti.
Në ketë rrugë u gjendën dy mjete të veçanta të llojit rrul, si edhe një mjet tjetër që shërbente për shtrimin e asfaltit, ky mjet rezultoi i ndezur në momentin e këqyrjes. Mjetet ishin të subjektit “Vëllezërit Hysa” shpk.
Prokuroria administroi praktikën e Bashkisë Belsh për rikonstruksionin e rrugës “Shkëndie”. Kontrata ishte nënshkruar në 10 shtator 2024, ndërmjet bashkisë dhe kompanisë “Vëllezërit Hysa” shpk.
Kontrata parashikonte afat punimesh 67 ditë. Punimët filluan në 20 janar 2025. Në 19 Mars të këtij viti, kontrata është amenduar, duke u shtyrë afati i përfundimit të punës deri në 27 Maj 2025.
Drejtori i Urbanistikës në Bashkinë Belsh, Ndriçim Reka, deklaron se nuk e ka idenë se përse punimet kanë filluar rreth 6 muaj pas nënshkrimit të kontratës. Ndërsa, sa i përket zgjatjes së afatit të punimeve, ai thotë se drejtoria e tij është shprehur dakord.
“Kemi qënë dakort që të shtyhet kontrata dhe të miratohet kërkesa. Gjatë zbatimit të kontratës është konstatuar se rruga ‘Idriz’, e përfshirë në projektin e rikonstruksionit, ishte rehabilituar më parë nga Fondi Shqiptar i Zhvillimit. Për këtë arsye, është propozuar që lekët të shpenzoheshin në rrugë që kalojnë në fshatra të tjera”, deklaroi Reka para grupit hetimor.
Lorenc Hoxha, drejtuesi i “Zeokonsult”, kompanisë së kontraktuar për mbikqyrjen e punimeve mbi atë kontratë, deklaron se është propozuar nga bashkia Belsh që fondet e parashikuara për rrugën “Idriz” të kalonin për rrugë të tjera.
Hoxha tha para grupit hetimor se ai, së bashku me përfaqësues të kompanisë “Vëllezërit Hysa”, kanë shkuar “në tre segmente rrugore të cilat nuk kanë emërtime dhe kanë kryer matjet për të cilat kanë mbajtur dhe procesverbal, i cili është aprovuar nga autoriteti kontraktor”.
Mbikqyrësi i punimeve ka deklaruar se atij “i është komunikuar verbalisht nga ana e Kryetarit të Bashkisë Belsh, Arif Tafani, që të shkonte dhe të bënte matjet e mësipërme në këto segmente rrugore”.
Por, kryebashkiaku Tafani, megjithëse drejtuesi i autoritetit kontraktor, pra personi kryesor i interesuar për shpenzimin e buxhetit të institucioni, ia lë përgjegjësinë mbikqyrësit të punimeve.
“Detyrimi për të ndryshuar projektin, është i mbikëqyrësit të punimeve dhe se ai nuk di detaje rreth azhornimit të projektit”, shprehet Tafani.
Në vijim të hetimeve, Prokuroria e Elbasanit njoftoi në 10 Maj 2025 se kishte nxjerrë katër urdhëra ndalimi.
“Në tërësi të veprimeve hetimore të kryera deri në këto momente, rezulton se ka dyshime të arsyeshme që punonjës të IMT Bashkia Belsh kanë kryer veprën penale të “Shpërdorimit të detyrës” të parashikuar nga neni 248 i Kodit Penal, pasi me mosveprimet e tyre kanë lejuar që subjekti “Vëllezërit Hysa” shpk të shtrojnë pa projekt rrugë të brendshme në qytetin e Belshit, të dyshuara të kryera në funksion të fushatës elektorale për zgjedhjet e datës 11.05.2025.
Nga ana e subjektit “Vëllezërit Hysa” shpk është kryer vepra penale e “Ndërtimit të paligjshëm” parashikuar nga neni 199/a/3 i Kodit Penal.” – thuhej në atë njoftim të Prokurorisë.
Marrë nga Boldnews.al
