Në kuadrin e Procesit të Berlinit, nismë ku përfshihen vendet e Ballkanit Perendimor dhe disa shtetete të BE-së si dhe Britania e madhe, u zhvillua takimi i radhës në Belfast në nivelin e ministrave të jashtëm.
Në një prononcim për mediat ministri i Jashtëm i Gjermanisë Johann Wadephullidhur me takimin në Belfast vuri në dukje, se “po takohemi këtu sot, dhe kjo mbetet e rëndësishme, për të diskutuar perspektivat e pranimit në BE për shtetet e Ballkanit Perëndimor. Sipas mendimit tim, kemi një dritare mundësie në vitet e ardhshme gjatë mandatit të Komisionit të BE-së dhe Parlamentit të BE-së që duhet të shfrytëzohet. Sepse, nga njëra anë, ka shpresë të madhe në këto shtete të Ballkanit Perëndimor, dhe, nga ana tjetër, ekziston edhe një frikë e madhe se në fund të fundit do të jetë një proces që nuk sjell asnjë rezultat. Dhe kjo është arsyeja pse duhet të jemi konkretë”, theksoi Wadephul.
Procesi i Berlinit si katalizator i nevojshëm
Wadephul vlerësoi, se Procesi i Berlinit ka qenë gjithmonë katalizatori i nevojshëm për këtë. Dhe fakti që po riaktivizohet këtu, është i paçmuar: “Jam jashtëzakonisht mirënjohës që Mbretëria e Bashkuar ka marrë nismën. Dje patëm një diskutim shumë të frytshëm, i cili tregoi gjithashtu se dakordësia është e mundur.”
Sa u përket ritmevenë procesin e antarësimit të vendeve të Ballkanit Perendimor në BE, ministri Wadephul u tha gazetarëve: “Pranimi i këtyre shteteve nuk mund të ndodhë në një moment në të ardhmen, por duhet të ndodhë në një të ardhme të parashikueshme. Kjo kërkon reforma nga shtetet, të cilat ne duam t’i inkurajojmë që t’i zbatojnë ato. Dhe shpresoj, pas asaj që dëgjova këtu mbrëmë, se me vullnetin e nevojshëm nga të dyja palët, do t’i shohim rezultatet e nevojshme shumë shpejt.”
Britania e Madhe kryesuese e radhës së Procesit të Berlinit
Pikërëndesat e kryesisë britanike të radhës në këtë proces sivjet janë temat e pajtimit, sigurisë, integrimit rajonal dhe migracionit. Më 22 tetor do të pasojë samiti i kryetarëve të shteteve dhe qeverive në Londër.
Që prej vitit 2014 Procesi i Berlinit mbështet bashkëpunimin rajonal ndërmjet gjashtë vendeve të Ballkanit Perëndimor: Krahas Shqipërisë, Bosnjë-Hercegovinës, Malit të Zi, Kosovës, Maqedonisë së Veriut dhe Serbisë në këtë format marrin pjesë edhe disa vende të BE-së si dhe Mbretëria e Bashkuar dhe disa institucione të BE-së.
Marrë nga Deutsche Welle
