Presidenti i SHBA Joe Biden ndihet “personalisht i lënduar” dhe “i tradhtuar” nga mungesa e dukshme e besimit tek ai nga shumë demokratë pas debatit të tij katastrofik me kandidatin republikan për president Donald Trump, raportoi NBC të premten, duke cituar burime.
Sipas raporteve të shumta, performanca në skenë e Biden, e përshkruar si jo koherente dhe me gafa, bëri që shumë liderë dhe donatorë demokratë të përpiqen të gjejnë një zëvendësues për kandidatin 81-vjeçar.
Ndërsa disa politikanë me peshë demokratë, përfshirë ish-presidentët Barack Obama dhe Bill Clinton, kanë përsëritur publikisht mbështetjen e tyre për Biden, ata kanë bërë pak për të konsoliduar partinë pas tij, raportoi NBC.
Burimet pohuan për gazetën se Biden “ndihet i zemëruar” me përpjekjet për ta detyruar atë të dalë nga gara për Shtëpinë e Bardhë, me një person që sugjeroi se liderët demokratë në thelb po ndihmonin Trumpin, i cili së fundmi i mbijetoi një atentati, për të siguruar fitoren.
“A mund të kujtojmë të gjithë për një minutë, se të njëjtët njerëz që po përpiqen të largojnë Joe Biden, janë të njëjtët njerëz që na dhanë Donald Trumpin? Në vitin 2015, Obama, [Nancy] Pelosi, [Chuck] Schumer e shtynë Bidenin mënjanë në favor të Hillary [Klintonit]; ata e kishin gabim atëherë dhe e kanë gabim tani”, tha një burim i NBC, duke iu referuar humbjes së Klintonit, kundër Trump në vitin 2016.
