Seanca plenare e ditës së sotme ka nisur në Kuvend që prej orës 10:00
Kryetarja e Kuvendit, Elisa Spiropali ka hapur seancën duke lexuar pikat e rendit të ditës, për të cilat pritet të ketë diskutime.
Seanca ka nisur me diskutime ku fillimisht kreu i grupit parlamentar të PD-së, Gazment Bardhi dhe deputeti demokrat Flamur Noka kanë kërkuar që seanca të ndërpritet, për shkak se në sallë është një numër i vogël i deputetëve. Sipas tyre, nevojiten 70 deputetë minimumi për të nisur mbledhjen e Kuvendit.
Në seancë sot mungonte edhe kryeministri Edi Rama edhe lideri i PD-së, Sali Berisha. • Ky i fundit ndodhet për vizitë pune në Bruksel.
Më tej janë zhvilluar debate të tjera, mes opozitës dhe mazhorancës lidhur me rezultatin e zgjedhjeve të 11 majit.
Noka tha se themelet e pushtetit të mazhorancës qëndrojnë vetëm mbi votën e blerë. Ai tha se ditën e zgjedhjeve përballë opozitës, u vu shteti elektoral.
Nga ana tjetër, ministri Taulant Balla, duke iu drejtuar opozitës, tha se pretendimet e tyre për manipulim votash po rrëzohen dita-ditës. Ministri u shpreh se zgjedhjet parlamentare tashme kanë përfunduar dhe PS ishte fituesja me një diferencë të madhe votash.
Gjatë fjalës së tij, Bardhi u shpreh se ishte opozita ajo që ka thënë se krimi i organizuar ka marrë peng zgjedhjet por ishte shefi i delegacionit të Parlamentit Europian për 11 majin. Ai tha se vetë vëzhguesit e OSBE/ODIHR kanë thënë se krimi i organizuar kishte marrë peng zgjedhjet e qarkut të Elbasanit.
Bardhi theksoi se raporti i OSBE/ODIHR për zgjedhjet tregoi qartë bashkëpunimin e elementëve kriminale me partitë politike. Bardhi u shpreh se ky shqetësim është jo vetëm i PD-së por është i të gjithë popullit dhe tha se opozita do ta ngrejë këtë problem në çdo institucion ndërkombëtar.Ai shtoi më tej se opozita e do Shqipërinë në Bashkimin Europian, por me të njëjtat standarde të procesit zgjedhor si Franca apo Italia dhe jo si Rusia, apo Serbia.
Marrë nga Dosja.al
