Mesditën e të martës Alfapress publikoi një filmim nga një restorant ku dukej deputeti i PD Arjan Ndoja dhe vëllai i kryeministrit, Olsi Rama me një grup personash të tjerë. Pamjet kanë ngjallur aludime, pasi portali në fjalë kishte rrethuar me rreth të kuq një person, ndërsa në tekst thuhej se aty ishin edhe “persona të dyshuar se i përkasin organizatës “Troplini”. Por Ndoja, në një deklaratë publike, ka sqaruar se dreka në fjalë nuk është e ditëve të fundit, por i përket katër viteve më parë.
Reagimi i plotë i Arjan Ndojës
“Të nderuar ndjekës dhe miq!
Marr shkas nga publikimi i një lajmi dhe një video sot, në portalin ‘Alfapress’ ku shfaqem unë dhe shtetasi Olsi Rama, së bashku me persona të tjerë duke drekuar.
Në lidhje me sa më sipër, ju bëj me dije sa më poshtë:
Dreka është organizuar rreth katër vite më parë, më datë: 16.11.2021, nga shtetasit Bilbil dhe Hajredin Kastrati. Dreka është bërë në fshatin Bushtricë të Kukësit.
Unë kam qenë i ftuar dhe jo organizatori, por nuk kam pas arsye që të braktisja drekën e organizuar nga personat e lartpërmendur, dhe as të mbaja qëndrim ndaj askujt, përderisa isha i ftuar. Ky qëndrim është pjesë e edukatës time familjare dhe prejardhjes, dhe një zakon i mirë i shqiptarëve që i ruajnë akoma si vlera, mikpritjen dhe nderin.
Prezent kanë qenë këta persona: Bilbil Kastrati, Hajredin Kastrati, Luftar Kastrati, Dashamir Guza, Azem Celmani, Adnan Suknikaj, Luan Zeka, Ahmet Cani, Mondi Voga, Lumir Soja, Ardit Toska, Bledar Kakuli, Përparim Bulica, Astrit Ternova, Nardi Xhamaxhi, Astrit Matmuja, Ardit Raines, tre rapsodë të Kukësit dhe Olsi Rama.
Personi që në video është vendosur me rreth si shtetasi Ervis Doci, është Ardit Raines.
Me respekt,
Arian Ndoja”
Marrë nga Lapsi.al
