Egjipti është duke zhvilluar një plan për të rindërtuar Rripin e Gazës, që nuk parasheh largimin e palestinezëve nga territori i tyre, teksa shtetet arabe po tentojnë të minimizojnë propozimin e presidentit amerikan, Donald Trump për t’i larguar banorët nga zona, dhe që Shtetet e Bashkuara të marrin kontrollin e territorit.
Plani, sipas një raportimi të medias shtetërore të Egjiptit, Al-Ahram, bën thirrje për krijimin e “zonave të sigurta” brenda Gazës, ku palestinezët do të mund të qëndronin derisa kompanitë ndërtuese prej Egjiptit dhe vendeve tjera të rindërtonin infrastrukturën.
Tri zonat e sigurta do të funksionin për një periudhë fillestare gjashtëmujore, sipas planit.
Shtëpitë mobile do të mund të krijoheshin dhe do të mundësohej dërgimi i ndihmave humanitare, parasheh mes tjerash plani.
Ky projekt rindërtimi – që mund të zgjasë pesë vjet – do të ofronte mijëra vende pune për banorët e Gazës, ka thënë një zyrtar i Egjiptit për agjencinë e lajmeve Associated Press (AP).
Dy zyrtarë të Egjiptit dhe diplomatë perëndimorë i kanë thënë AP-së se Kairoja është duke diskutuar planin me zyrtarë në Evropë, Arabinë Saudite, Katar dhe Emiratet e Bashkuara Arabe. Në këto negociata është thënë se po diskutohen edhe ndarjet buxhetore.
Më 4 shkurt, Trump i ka thënë kryeministrit izraelit, Benjamin Netanyahu, pas një takimi në Shtëpinë e Bardhë, se “SHBA-ja do të marrë kontrollin e Rripit të Gazës dhe do të punojë në të”.
“Ne do ta zotërojmë atë”, pati thënë Trump.
Më shumë se 2.3 milionë njerëz jetojnë në Gazë, dhe shumica e tyre veçse janë zhvendosur si pasojë e luftës 16-mujore mes ushtrisë izraelite dhe Hamasit – grup palestinez i shpallur terrorist prej Shteteve të Bashkuara dhe Bashkimit Evropian.
Palestinezët kanë thënë zëshëm se nuk do të largohen prej tokës së tyre.
Sipas raportimeve në media, edhe Arabia Saudite është duke çuar përpara një plan për të përmbysur planin e Trumpit.
Egjipti, Jordania dhe Emiratet besohet se janë të përfshira në këto përpjekje, pasi ato kanë thënë se nuk janë të gatshme të strehojnë popullsinë e Gazës.
Sekretari amerikan i Shtetit, Marco Rubio, i cili ka arritur në Izrael më 15 shkurt, në kuadër të një vizite në Lindje të Mesme, ka shprehur mbështetje të plotë për synimet e Izraelit në Rripin e Gazës dhe ka thënë se Hamasi “duhet të shfaroset”.
Megjithatë, armëpushimi mbetet i brishtë, ndonëse Hamasi është duke liruar pengje izraelite, në këmim të të burgosurve palestinezë që janë mbajtur në Tel Aviv.
Marrë nga Radio Evropa e Lirë
