Komisioni hetimor për Shëndetësinë vijoi sot me pyetjen e dëshmitarëve për të sqaruar çështjen e koncesionit të sterilizimit.
Biznesmeni Ilir Rrapaj i cili mbërriti në Kryesinë e Kuvendit, i prangosur dhe i shoqëruar nga policia, është i pari që po jep dëshminë e tij. Rrapaj është pyetur nga kryetarja e komisionit, Albana Vokshi për njohjen me ish- ministrin dhe zëvendësministrin e Shëndetësisë. Ai deklaroi se Klodian Rrjepajn dhe Ilir Beqajn i ka njohur në një aktivitet të qeverisë shqiptare në 2013.
Nga ana tjetër, në listën e dëshmitarëve është edhe ministrja Anila Denaj, e cila në atë kohë ka mbajtur postin e drejtoreshës së Fondit të Sigurimit të Detyrueshëm të Kujdesit Shëndetësor dhe mësohet se nuk ka qenë dakord për çmimet e larta të sterilizimit teksa ka paraqitur dhe ankesë
Koncensioni 10 vjeçar me vlerë afro 100 milionë dollarë iu dha kompanisë ‘SaniService’, një bashkim kompanish ku Ilir Rrapaj me kompaninë e tij ‘Investital LLC’ është zotëruesi kryesor i aksioneve, krahas kompanive italiane “Servizi Italia”, “Tecnosanimed” dhe “U.Jet S.r.l” të Staccinit.
Rrapaj ndodhet në arrest me burg prej 16 gushtit 2024, ndërsa i arrestuar është edhe ish-zv.ministri i Shëndetësisë Klodian Rjepaj.
Më herët, kryetarja e komisionit, Albana Vokshi lajmëroi në mbledhje se 3 biznesmenët italianë të thirrur për të dëshmuar kanë refuzuar të paraqiten dhe të japin dëshminë e tyre
Ajo u shpreh se Umbro Staçini, Elisabetta Anzanello dhe Giorgio Tardioli kanë refuzuar tre herë pjesëmarrjen e tyre në komision. Vokshi paralajmëroi se do të njoftohet policia e shtetit që të mundësojë ardhjen e tyre në Komisionin e Koncesionit të Sterilizimit.
