Interpoli ka refuzuar kërkesën e një gjykate boshnjake për të lëshuar urdhërarrest ndërkombëtar për Milorad Dodikun, liderin separatist serb të Bosnjës, i cili akuzohet për sulm ndaj rendit kushtetues.
Gjykata shtetërore e Bosnjës ka konfirmuar për Reuters se kërkesa për urdhërarrest ndërkombëtar nuk ka hyrë në fuqi, por nuk dha detaje mbi arsyet e vendimit të Interpolit.
Ky zhvillim thellon krizën mes Dodikut dhe Perëndimit, ndërsa ai gëzon mbështetje nga Rusia dhe Serbia, duke u përballur me kundërshtimin e SHBA-së dhe BE-së. Mosmarrëveshja shihet si një nga kërcënimet më të mëdha për stabilitetin në Ballkan që nga vitet 1990.
Dodik, presidenti i Republikës Serbe të Bosnjës, u dënua në shkurt të vitit 2025 me një vit burg dhe ndalim të posteve politike për gjashtë vjet, pasi kishte kundërshtuar vendimet e të dërguarit ndërkombëtar në Bosnje. Pasi u kërkua urdhërarresti ndërkombëtar për të dhe një ndihmës të tij, ai shkoi në Serbi, Izrael dhe Rusi për të siguruar mbështetje politike.
Dodiku e ka përshëndetur vendimin e Interpolit, duke e cilësuar si provë se urdhërarresti ishte politik. Të mërkurën, ai është kthyer në Bosnje, duke vazhduar retorikën për shkëputjen e Republikës Serbe nga Bosnja.
Përplasja ligjore dhe politike mbetet e hapur, ndërsa autoritetet boshnjake vazhdojnë përpjekjet për të ndjekur rastin e Dodikut.
Marrë nga Reuters
