Zëvendëspresidenti amerikan J.D. Vance tha se, SHBA-ja ka bërë një “propozim shumë të qartë” për Rusinë dhe Ukrainën në rrugën drejt një marrëveshjeje paqeje, raportoi Bloomberg.
Vance theksoi se “ka ardhur koha që të dyja vendet ose të thonë po ose që Shtetet e Bashkuara të tërhiqen nga ky proces”, duke konfirmuar në thelb raportin përkatës të Axios që vë në dukje se Uashingtoni është në pritje të një përgjigjeje nga Kievi ndaj kornizës së paqes që i dërgoi, e cila, ndër të tjera, njeh pushtimin e territoreve të Ukrainës nga Rusia.
“Linjat aktuale, diku afër tyre, janë aty ku përfundimisht, mendoj se linjat e reja do të tërhiqen në këtë konflikt,” u tha Vance gazetarëve gjatë një vizite në Indi të mërkurën.
“Duhet të ketë disa shkëmbime territoriale”
Kjo do të thotë se si Ukraina ashtu edhe Rusia do të duhet të heqin dorë nga disa territore që secila palë kontrollon aktualisht. Ngrirja e konfliktit përgjatë vijave ekzistuese të betejës do të ishte një sakrificë shumë më e madhe për Ukrainën, e cila kërkon të rimarrë të gjithë territorin në lindje dhe jug të vendit që Rusia ka pushtuar që nga viti 2014, duke përfshirë Krimenë dhe pas pushtimit në shkallë të plotë të shkurtit 2022.
SHBA është e gatshme të njohë kontrollin e Rusisë mbi gadishullin ukrainas të Detit të Zi dhe të lehtësojë sanksionet kundër Moskës si pjesë e një marrëveshjeje të mundshme paqeje. Presidenti Volodymyr Zelensky tha të martën se vendi i tij nuk do ta njohë okupimin rus të Krimesë, e cila njihet ndërkombëtarisht si territor ukrainas.
“Do të duhet të ketë disa shkëmbime territoriale,” tha Vance, duke shtuar se megjithëse kufijtë mund të mos përfundojnë të jenë pikërisht linjat e frontit që janë tani, për të ndaluar vrasjen të dyja palët duhet të “ulin armët, të ngrijnë këtë situatë dhe të vazhdojnë në ndërtimin e një Rusie më të mirë dhe një Ukrainë më të mirë”.
Të martën, Uashingtoni ka dërguar një kornizë paqeje në Kiev, për të cilën pret një përgjigje sot.
Siç thuhet në raport, duke cituar burime të mirë informuara, kuadri i paqes parashikon njohjen de facto të kontrollit të Rusisë mbi pothuajse të gjitha territoret që ajo ka pushtuar që nga shpërthimi i luftës në shkurt 2022 dhe njohjen de jure të sovranitetit rus mbi gadishullin e Krimesë, si dhe një angazhim që Ukraina nuk do të bëhet një vend anëtar i NATO-s.
Sipas raportit, propozimi i paraqitur javën e kaluar parashikon gjithashtu se SHBA do të vazhdojë me heqjen e sanksioneve që ka vendosur ndaj Rusisë që nga viti 2014, ndërsa një pjesë e rajonit të Kharkiv që është pushtuar nga ushtria ruse do të kthehet në kontrollin e Ukrainës.
Vance tha se ishte “optimist” për bisedimet.
Presidenti amerikan Donald Trump paralajmëroi javën e kaluar se ai është i gatshëm të braktisë përpjekjet për t’i dhënë fund luftës në Ukrainë nëse një marrëveshje nuk arrihet së shpejti. I dërguari i tij Steven Witkoff do të udhëtojë në Rusi më vonë këtë javë, pasi ka vizituar tashmë presidentin Vladimir Putin tre herë, që nga inaugurimi i tij dhe e ka përshkruar takimin e tij më të fundit si “magjepsës”.
Vance tha se ishte “optimist” rreth bisedimeve, duke shtuar se ai sheh që të gjitha palët të kenë negociuar me mirëbesim deri tani. Bisedimet e planifikuara në Londër të mërkurën midis zyrtarëve të lartë nga Shtetet e Bashkuara, Ukraina dhe fuqitë e mëdha evropiane, u zvogëluan në takime të nivelit teknik, pasi vizita e Sekretarit të Shtetit të SHBA-së, Marco Rubio, u shty.
Marrë nga Bloomberg
