Presidenti rus, Vladimir Putin, deklaroi se ka arritur “mirëkuptime” me Presidentin amerikan Donald Trump mbi përfundimin e luftës në Ukrainë, gjatë takimit të tyre në Alaska muajin e kaluar. Ai nuk dha detaje nëse do të pranonte bisedime paqeje me Presidentin ukrainas Volodymyr Zelensky, të ndërmjetësuara nga Trump, i cili kishte vendosur si afat të hënën për një përgjigje nga Moska.
Duke folur në samitin e Organizatës së Bashkëpunimit të Shangait në Tianjin, ku u takua me Xi Jinping dhe Narendra Modi, Putin mbrojti pushtimin rus të Ukrainës dhe fajësoi Perëndimin për krizën. Ai falënderoi udhëheqësit kinezë dhe indianë për mbështetjen dhe përpjekjet për “lehtësimin e krizës ukrainase”.
Pas takimit në Alaska, i dërguari special i SHBA-së, Steve Witkoff, tha se Putin kishte rënë dakord për garanci sigurie për Ukrainën si pjesë e një marrëveshjeje të mundshme paqeje, megjithëse Moska ende nuk e ka konfirmuar zyrtarisht.
Putin përsëriti gjithashtu që kriza në Ukrainë nuk u shkaktua nga sulmi rus, por nga një “grusht shteti” i mbështetur nga Perëndimi, dhe e lidhi konfliktin me përpjekjet perëndimore për të tërhequr Ukrainën në NATO.
Komenti i tij vjen disa ditë pasi Rusia kreu sulmin e dytë më të madh ajror ndaj Ukrainës gjatë luftës, që shkaktoi dhjetëra viktima. Presidenti francez Emmanuel Macron paralajmëroi se afati i dhënë nga Trump për bisedime paqeje me Zelenskyn do të tregonte nëse Putin është i gatshëm për marrëveshje.
Trump, i cili kishte marrë pjesë në takimin me Putinin, insistoi se një marrëveshje paqeje nuk do të përfshinte hyrjen e Ukrainës në NATO, por do të siguronte garanci sigurie për vendin, me mbështetje evropiane dhe amerikane. Ndërkohë, Zelensky ka hedhur poshtë propozimet për një zonë tampon me Rusinë, duke akuzuar Moskën se nuk është e gatshme për diplomaci dhe po shtyn përfundimin e luftës.
Marrë nga CNN
