Kryeministri Edi Rama është përballur me kundërshtime nga qytetarët e Maliqit gjatë diskutimeve për riorganizimin territorial, teksa banorët nuk pranojnë propozimin për shkrirjen e bashkisë së tyre dhe bashkimin me Bashkinë e Korçës. Gjatë takimit, qytetarë, punonjës të administratës dhe përfaqësues të sektorit të bujqësisë kanë kundërshtuar propozimin, duke kërkuar që Maliqi të vazhdojë të funksionojë si bashki më vete.
“Mos e shkrini”, “Ne jemi kundër” dhe “Vendimin ndryshojeni, mos e shkrini Maliqin”, kanë qenë disa prej reagimeve të qytetarëve gjatë debatit me kreun e qeverisë.
Kundërshtimet janë lidhur edhe me problematikat e zonës së fushës së Maliqit dhe shqetësimin se bashkimi me Korçën mund të ndikojë në mënyrën e administrimit të territorit. Sipas një burimi brenda takimit, është pretenduar se rreth 97 për qind e qytetarëve janë kundër shkrirjes së Bashkisë Maliq.
Nga ana e tij, Rama ka deklaruar se qëndrimet në dy zonat janë të ndryshme, duke thënë se në Korçë nuk ka kundërshtime ndaj bashkimit, ndërsa banorët e Maliqit shfaqen të shqetësuar dhe të pakënaqur me propozimin.
Marrë nga Dosja.al
