Të dhënat e të drejtave të njeriut në Shqipëri janë shqyrtuar nga Grupi i Punës për Rishikimin Periodik Universal të Këshillit të Kombeve të Bashkuara për të Drejtat e Njeriut (UPR) ditën e djeshme. Pas rishkimit, vendet në OKB kanë dhënë dhe rekomandimet dhe adresimet që Shqipëria duhet të ndjekë. Sipas Ambasadores së Mbretërisë së Bashkuar për të Drejtat e Njeriut, Eleanor Sanders, korrupsioni në Shqipëri dhe dhuna me bazë gjinore mbeten një problem shumë i madh. Po ashtu Sanders ka kërkuar që Shqipëria të forcojë pavarësinë e autoriteteve gjyqësore dhe të mos ketë ndërhyrje politike.
Deklarata e Plotë:
Faleminderit zonja Presidente. Mbretëria e Bashkuar vlerëson kontributin e Shqipërisë si Anëtare e Këshillit të të Drejtave të Njeriut dhe progresin e rëndësishëm të bërë në reformën gjyqësore që nga Rishikimi i fundit i Shqipërisë. Mirëpresim krijimin në vitin 2019 të Strukturës së Posaçme kundër Korrupsionit dhe Krimit të Organizuar, e cila ka bërë një përparim të mirë fillestar në adresimin e rasteve të rënda të korrupsionit.
Ne i rekomandojmë Shqipërisë:
Zbaton plotësisht Strategjinë e saj Kombëtare për Barazinë Gjinore 2021-2030, duke përfshirë rishikimin e legjislacionit përkatës si Ligji Nr. 9970/2008 për barazinë gjinore në shoqëri.
Forcon pavarësinë e autoriteteve të saj gjyqësore për të vepruar pa ndërhyrje të panevojshme apo mbikëqyrje politike
Zbaton të gjitha rekomandimet e pazgjidhura të OSBE/ODIHR për përmirësimin e zhvillimit të zgjedhjeve në Shqipëri.
