Në selinë e socialistëve nuk ka shqetësim për aferat e korrupsionit, skandalet që pasojnë njëri-tjetrin, keqqeverisjen dhe krimin e bërë bashkë me pushtetin në të gjitha nivelet.
Nga njëri takim në tjetrin ka një tension të brendshëm dhe një pendesë në rritje te vetë Edi Rama dhe oborri i pushtetit të tij.
Pendesë që bënë ndryshimet në Kodin Zgjedhor për të mundësuar votën e diasporës. Arsyeja lidhet vetëm me kontrollin e kësaj vote e jo me aspekte të tjera organizative.
Me ton ultimativ, Rama iu ka kërkuar 800 mijë vota për PS-në vetëm nga diaspora. I pakënaqur me punën e deritanishme pasi Taulant Balla bëri një raportim të gjendjes, Rama u largua nga takimi në mënyrë demonstrative.
Aktualisht saktësoi burimi ynë, PS në diasporë ka kontaktuar apo patronazhuar rreth 50-60 mijë shqiptarë. Kjo është një shifër tejet e papërfillshme në raport me numrin total të shqiptarëve më të drejtë vote në disaporë që llogaritet në 1 milion e 630 mijë shtetas.
Shqetësimi është përcjellë edhe në takime të tjera me deputetë e përfaqësues të PS për të pasur një angazhim më të madh me diasporën.
Trajnim për sistemin e ri të patronazhimit
PS mëson Lapsi.al po ndërton një databazë vetëm me votuesit e diasporës, të cilën e quan Libri i Kontakteve të Diasporës. Nuk është gjë tjetër veçse një sistem i ri patronazhimi për shqiptarët jashtë vendit.
Kur u miratua mundësimi i votës së diasporës, Lapsi.al e ka paralajmëruar një skemë të tillë si ajo që Rama zbatoi në Shqipëri në zgjedhjet e vitit 2021 dhe që Lapsi.al e denoncoi i pari me faktë. Dosje që fatkeqësisht nuk u zbardh kurrë nga drejtësia e re me “heronjtë e fëmijëve tanë”.
Në selinë rozë kanë nisur ndërkohë trajnimet për hedhjen e të dhënave në sistem, ku kanë akses vetëm pak njerëz të besuar nga çdo qark e pranë kupolës së pushtetit.
Formulari
Paralelisht me trajnimin ka nisur edhe shpërndarja e një formulari të detyrueshëm për punonjësit e administratës. Kërkohen 10 emra bashkë me kontaktet e tyre jashtë vendit. Të njohur apo të afërm të deklaruesit që janë me të drejtë vote në diasporë.
Në formular duhet speficikuar emër mbiemër, atësia, numri i telefonit, kodi postar dhe shteti ku banon. Nuk ka dyshim që edhe selitë tona diplomatike kudo në botë do të vihen në shërbim të kësaj skeme kriminale, për të lehtësuar procesin e mbledhjes së votave për Partinë Socialiste.
Përtej entuziazmit që krijohet nëpër sallat e takimeve jashtë vendit të cilat mbushen edhe me militantë të PS-së të ardhur nga Shqipëria, por edhe me njerëz të përzgjedhur nga kontaktet e drejtuesve socialistë, siç ndodhi sidomos në SHBA, Edi Rama i trembet fatit të votës së diasporës.
Nuk ka kontroll maksimal e as garanci siç ka me pjesën dërrmuese të votuesve brenda vendit. Për këtë arsye presioni mbi të gjithë strukturën e PS është tejet i lartë. Edhe në takime të ndryshme partiake brenda vendit kryefjala e drejtuesve të PS-së është vota e diasporës dhe patronazhimi i saj me çdo çmim.
PS kërkon tjetër ndërhyrje në Kodin Zgjedhor
Dekretimi i datës së zgjedhjeve po shtyhet në limit të afatit nga Bajram Begaj me porosi të socialistëve pikërisht për t’u vendosur përfundimisht se çdo të bëhet me votën e diasporës.
PS e PD kanë një mekanizëm bllokimi në Komisionin Qëndror të Zgjedhjeve për modalitetet e administrimit të votës. Damian Gjiknuri ka kërkuar një tjetër ndërhyrje në Kodin Zgjedhor ndërsa PD nuk e sheh ende të nevojshme këtë lëvizje.
KQZ pretendon se asnjë prej operatorëve ndërkombëtarë nuk merr përsipër në më pak se 30 deri 45 ditë sjelljen e zarfeve me fletët e votimit.
Sido që të shkojnë gjërat, pak po e sigurt, që Edi Rama s’ka për të hequr dorë nga vesi i patronazhimit të votave edhe në diasporë pavarësisht çmimit shumë më të lartë që mund të ketë ky operacional kriminal e antidemokratik.
Ndoshta dhe është e teprim të flasësh për standarde demokratike në një kohë kur kleptokracia dhe autokracia në Shqipëri kanë zënë vend.
Marrë nga Lapsi.al
