Administrata e presidentit Donald Trump ka shpallur Presidentin venezuelian Nicolás Maduro dhe aleatët e tij qeveritarë si pjesë të një organizate terroriste të huaj.
Shënimi i grupit të njohur si ‘Cartel de los Soles’, një term që ekspertët thonë se më shumë përshkruan zyrtarë qeveritarë të dyshuar për korrupsion sesa një organizatë kriminale të strukturuar, do t’i lejojë Presidentit Donald Trump të vendosë sanksione të reja që targetojnë asetet dhe infrastrukturën e Maduro. Megjithatë, ekspertët ligjorë nënvizojnë se kjo nuk autorizon përdorimin e forcës vdekjeprurëse.
Zyrtarët e administratës bëjnë të ditur se ky shënim, një nga mjetet më serioze të Departamentit të Shtetit për luftën kundër terrorizmit, mund të zgjerojë opsionet ushtarake të SHBA-së për veprime brenda Venezuelës.
‘Cartel de los Soles’ përdoret për të përshkruar një rrjet të decentralizuar brenda forcave të armatosura venezueliane, i lidhur me trafikun e drogës. Presidenti Maduro ka mohuar gjithmonë çdo përfshirje personale në trafik droge, ndërsa qeveria e tij ka mohuar ekzistencën e këtij grupi, që sipas disa ekspertëve nuk ekziston në kuptimin konvencional.
Shënimi u bë publik më 16 nëntor, ndërsa ushtria amerikane ka dërguar më shumë se një duzinë anijesh lufte dhe 15,000 trupa në rajon si pjesë e asaj që Pentagoni e ka quajtur ‘Operacioni Thika Jugore’. Ushtria amerikane ka kryer sulme me anije që kanë shkaktuar dhjetëra viktima si pjesë e fushatës kundër trafikut të drogës.
Presidenti Trump është informuar mbi një gamë opsionesh për veprime brenda Venezuelës, përfshirë sulme ndaj objekteve qeveritare ose ushtarake dhe operacione speciale. Opsioni i mosveprimit mbetet gjithashtu në tavolinë.
Sondazhet tregojnë se ka rezistencë publike ndaj përfshirjes së SHBA-së në rajon. Një sondazh i CBS News/YouGov tregoi se 70% e amerikanëve janë kundër veprimeve ushtarake në Venezuelë, ndërsa vetëm 30% e mbështesin.
Administrata Trump thotë se po punon për të ndaluar flukset e paligjshme të migrantëve dhe drogës, por ndryshimi i regjimit mund të jetë një efekt i mundshëm i këtyre përpjekjeve. Sipas një zyrtari amerikan, Trump shpreson që presioni të jetë i mjaftueshëm për ta detyruar Maduro të japë dorëheqjen pa ndërhyrje direkte ushtarake.
Trump gjithashtu ka shfaqur gatishmëri për një zgjidhje diplomatike, duke thënë javën e kaluar se Maduro ‘do të donte të bisedonte’ dhe më pas sugjeroi se ai do të ishte i gatshëm të fliste me të ‘në një kohë të caktuar.’
Ndërkohë, tensionet po rriten: SHBA-ja ka kryer javën e kaluar demonstrimin e saj më të madh ushtarak pranë Venezuelës, me të paktën gjashtë aeroplanë amerikanë të shfaqur pranë bregut të vendit, përfshirë një F/A-18E supersonik, një bombardues strategjik B-52 dhe aeroplanë të zbulimit.
Gjatë fundjavës, tre linja ajrore ndërkombëtare anuluan fluturimet nga Venezuela pasi Administrata Federale e Aviacionit të SHBA paralajmëroi për një ‘situatë potencialisht të rrezikshme’ gjatë fluturimeve mbi vendin.
Marrë nga Associatesd Press
