Deputetët e Lëvizjes Vetëvendosje janë shprehur të bindur se i kanë votat e mjaftueshme për ta formuar qeverinë në seancën konstituive më 15 prill.
Deputetët e partisë që fitoi zgjedhjet sot e kishin ditën për t’u regjistruar si deputet. Dhe janë pyetur nga gazetarët nëse i kanë numrat e nevojshëm për formimin e qeverisë.
Ministri në detyrë i Financave, Hekuran Murati, i pyetur se a i kanë votat e mjaftueshme, u shpreh: “Patjetër që po”.
“61 i kërkon Kushtetuta. Sa më shumë, aq më mirë”, ka deklaruar ai, pa dhënë detaje të tjera.
I bindur se VV-ja do ta formojë qeverinë është shprehur edhe Agim Bahtiri. Por nuk tregoi se me cilët deputetë do ta mbërrijë numrin e nevojshëm prej 61.
“Mendoj se po… numrat janë të deputetëve, 61 e më shumë. Do të bëhet me deputet të Republikës së Kosovës”, u përgjigj ai.
Më konkret ishte deputeti Halil Thaçi. Sipas tij, kryeministër do të zgjidhet Albin Kurti me 63 vota.
“Me 63 vota, kryeministër do të jetë Albin Kurti, ndërsa kryeparlamentar Glauk Konjufca”, ka deklaruar Thaçi.
Ditë më herë, kryeparlamentari Konjufca pati thënë se kanë nevojë për koalicion për ta formuar qeverinë.
Kryeministri në detyrë Albin Kurti kishte ftuar për takim konsultues kryetarin e Lidhjes Demokratike të Kosovës, Lumir Abdixhiku. Por Abdixhiku kishte refuzuar ftesën. Në përgjigje, Abdixhiku ka thënë se gjuha e LVV-së karshi LDK-së ka pamundësuar bashkëpunimin e mundshëm në mes të këtyre dy taborëve politikë, për formimin e Qeverisë së re.
Vetë Kurti në disa raste ka refuzuar të përgjigjet nëse i kanë numrat e mjaftueshëm për qeverinë e re.
Në zgjedhjet e 9 shkurtit, LVV-ja mori 48 deputetë – jo mjaftueshëm për të qeverisur e vetme. Disa deputetë nga komunitetet joshumicë gjithashtu e kanë vënë në pikëpyetje nëse do ta votojnë një qeveri të udhëhequr nga Kurti.
Duhet 61 vota për ta zgjedhur kryeministrin.
Marrë nga Koha.net
