Të dhënat më të fundit të INSTAT tregojnë një ndryshim të dukshëm në strukturën e pagave.
Krahasuar me tremujorin e tretë të vitit 2024, kohë në të cilën Tatimet nisën aksionin kundër informalitetit në tregun e punës, tremujori i parë i vitit 2025 ka shënuar një ulje të ndjeshme të përqindjes së punonjësve të deklaruar me pagë minimale. Kjo gjë ka reflektuar një zhvendosje drejt pagave më të larta në të gjitha kategoritë.
Sipas të dhënave zyrtare, vetëm 12.4% e të punësuarve ishin në kategorinë e pagës minimale në T1/2025, nga 24.5% që ishin në T3/2024, duke shënuar një rënie prej mbi 12 pikë përqindje. Kjo është një nga nivelet më të ulëta të regjistruara vitet e fundit për këtë kategori page.
Ndërsa grupet e pagave mbi nivelin minimal kanë shënuar rritje të njëtrajtshme: grupi 40.001–50.000 lekë u rrit nga 20.1% në 23%.; grupi 50.001–60.000 lekë u rrit nga 9.0% në 12.8%; grupi 60.001–95.000 lekë, që përbën segmentin më të madh të punonjësve, u rrit në 25.4%.
Shifrat tregojnë se edhe përqindja e të punësuarve me pagë mbi 120.000 lekë u rrit nga 12.1% në 13.5%.
Nisma e Tatimeve në vitin 2024 ka konsistuar në krijimin e kritereve të riskut për të evidentuar tatimpaguesit mospërmbushës të detyrimeve dhe në dërgimin e mesazheve ndërgjegjësuese për nxitjen e përmbushjes vullnetare.
Nga krahasimi i të dhënave nga listëpagesat e dorëzuara 3 muajt e fundit të vitit 2024 ka pasur rritje, si në totalin e kontributeve, ashtu edhe në totalin e TAP.
Më konkretisht, në tetor 2024 shumatorja e kontributeve +TAP rezulton 17,286,731, 774 lekë, ndërkohë që deri në fund të vitit ajo rezulton 18,592,633,808 lekë, ose 1.3 miliardë lekë më shumë.
Marrë nga Ekofin.al
