Rajoni i Ballkanit duket më i rrezikuar se kurrë nga tërmetet, sipas gjetjeve të një grupi ekspertësh dhe pedagogësh të specializuar në sektorin e rrezikut sizmik dhe ndërtimit. Për këtë arsye, ata janë vënë në lëvizje për të forcuar kulturën e parandalimit dhe menaxhimit të rrezikut.
“Në rastin e Shqipërisë, dua të theksoj se nga 60 tërmete të raportuara, vetëm gjysma kanë ndodhur në shekujt e fundit. Ky fakt tregon se numri i tërmeteve të forta historike që mund të prekin Shqipërinë ndoshta është nënvlerësuar” – u shpreh Neritan Shkodrani.
Sipas diskutimeve në forumin “Risku sizmik dhe zvogëlimi i tij”, ekspertët nënvizuan se qytetet më të rrezikuara nga tërmetet janë Tirana, Durrësi, Vlora dhe Elbasani duke rritur ndjeshëm koeficientin e përgjithshëm të rrezikut sizmik për vendin.
“Probabiliteti për ndodhinë e një tërmeti, bazuar në historikun sizmik të vendit, është nga mesatar në të lartë. Për këtë arsye, i gjithë kuadri ligjor për mbrojtjen civile nis me vlerësimin e riskut nga fatkeqësitë” – theksoi Etleva Bajrami.
Gjatë aktivitetit u theksua rëndësia që ndërtimet e reja në Shqipëri të bëhen duke respektuar standardet e qëndrueshmërisë ndaj tërmeteve.
U soll si shembull Japonia, një vend i prekur shpesh nga tërmete të fuqishme, por që falë strukturave të sigurta, rrallë përballet me dëme të mëdha materiale.
Marrë nga Scantv.al
