Tre persona kanë humbur jetën dhe 81 të tjerë janë plagosur si pasojë e shembjes së një tribune në stadiumin Stade Olympique du 5 Juillet 1962, pas festimeve për fitoren e titullit kampion nga klubi i futbollit Mouloudia Club d’Alger.
Mediat e huaja, konfirmuan sot bilancin e ri të viktimave, pasi dy tifozë të plagosur ndërruan jetë nga plagët e marra gjatë incidentit të ndodhur një ditë më parë.
Ndërsa në një deklaratë të mëparshme, raportoheshin për një të vdekur dhe 50 të plagosur.
Ngjarja e rëndë ndodhi pas përfundimit të ndeshjes mes MC Alger dhe NC Magra, e cila përfundoi në barazim pa gola, duke i siguruar MC Alger titullin e nëntë kampion në historinë e klubit.
Presidenti i Algjerisë, Abdelmadjid Tebboune, ka shprehur ngushëllimet e tij për familjet e viktimave.
Sipas faqes së La Gazette du Fennec, një barrierë sigurie u thye pikërisht në momentin kur tifozët po përgatiteshin të festonin.
Marrë nga AFP
