Disa zona të Tiranës mbetën në errësirë mbrëmjen e djeshme, pas një problemi me furnizimin me energji elektrike. Kjo situatë ka shkaktuar problem tek banorët, pasi kaloi rreth dy orë pa energji elektrike.
Konkretisht, mungesë të energjisë pati në Njësitë Administrative 1 dhe 2, përfshirë Ali Demi, Shkozë, Tregun Elektrik, Saukun, etj.
Fillimisht u raportua se shkak i ndërprerjes mund të ketë qenë djegia e nënstacionit të Njësisë 2, por burime zyrtare nga Operatori i Shpërndarjes së Energjisë Elektrike (OSHEE) bëjnë me dije se defekti nuk lidhet me rrjetin e tyre, por me OST-në, pra linjat e tensionit të lartë 110 kV.
Lidhur me situatën reagoi edhe Operatori i Shpërndarjes së Energjisë Elektrike (OSHEE).
OSHEE njoftoi se pati një avari në linjën 110kV të OST dhe institucionet e rëndësisë së veçantë kanë marrë energji elektrike nga linjat e dyta.
Pas ikjes së dritave një situatë skandaloze u raportua në QSUT, ku mungesa e energjisë elektrike ka paralizuar punën në repartin më kritik të spitalit.
Sipas një denoncimi të një qytetari, pas ikjes së dritave, pacientët janë transferuar me shpejtësi nëpër korridoret e spitalit.
Kjo për shkak të dështimit të sistemit elektrik dhe pamundësisë për të mbajtur kushtet e nevojshme brenda dhomave të kujdesit intensiv.
Pas rreth dy orësh ndërprerje të energjisë elektrike, është riparuar avaria në linjën 110 kV të NST Traktora dhe zonat e prekura kanë nisur të furnizohen sërish me energji, por jo të gjithë.
Marrë nga Dosja.al
