Botërori 2026, që do të nisë më 11 qershor dhe do të përfundojë më 19 korrik, jo vetëm që do të jetë edicioni i parë historik me 48 skuadra, si edhe i pari që organizohet bashkërisht nga tre vende (Kanadaja, Meksika dhe Shtetet e Bashkuara), por do të sjellë edhe futjen e shumë rregullave të reja aspak të parëndësishme, me pasoja në shumë aspekte të lojës së futbollit, nga rivëniet anësore te goditjet nga këndi, nga zëvendësimet te ndërhyrja e VAR-it.
IFAB, organizmi që ka ekskluzivisht të drejtën për të ndryshuar “Laws of the Game”, miratoi ndryshimet në fjalë gjatë asamblesë së fundit vjetore më 28 shkurt. Rregullat e reja do të hyjnë zyrtarisht në fuqi më 1 korrik, siç ndodh zakonisht, pra nga fillimi i sezonit pasardhës, megjithatë IFAB ka parashikuar shprehimisht që kompeticionet t’i zbatojnë ato më herët dhe ka konfirmuar se do të përdoren në Botërorin që nis një muaj më parë.
Rivëniet anësore dhe goditjet e portës
Sa u përket rivënieve anësore dhe goditjeve të portës, në vazhdën e ndryshimit të rregullores të futur vitin e kaluar për të penguar portierët të mbajnë topin për shumë kohë, arbitri do të mund të nisë me dorë një numërim viziv prej pesë sekondash nëse mendon se një rivënie anësore ose një goditje nga porta po merr shumë kohë ose po vonohet qëllimisht. Nëse topi nuk vihet në lojë në fund të numërimit, rivënia anësore do t’i jepet skuadrës kundërshtare, ndërsa një goditje nga porta e vonuar do të sjellë një goditje nga këndi për kundërshtarët.
Lojtarët e zëvendësuar
E njëjta logjikë vlen edhe për zëvendësimet: për të lehtësuar më tej zhvillimin e ndeshjes, lojtarët e zëvendësuar do të duhet të lënë fushën brenda dhjetë sekondash nga momenti i shfaqjes së zëvendësimit në tabelën elektronike ose, në mungesë të saj, nga sinjali i arbitrit. Nëse lojtari nuk arrin të largohet brenda këtij afati, ai do të duhet gjithsesi të dalë, por zëvendësuesi nuk do të mund të futet në fushë deri në ndërprerjen e parë të lojës pas minutës së parë të kaluar nga rifillimi i ndeshjes.
Lojtarët e dëmtuar
Një masë e ngjashme do të futet edhe për dëmtimet: nëse një lojtar i nënshtrohet një vlerësimi mjekësor në fushë pas një dëmtimi ose nëse dëmtimi sjell ndërprerjen e lojës, lojtari do të duhet të largohet nga fusha dhe të qëndrojë jashtë për një minutë pas rifillimit të lojës.
Marrë nga Erurosport.com
