Çmimi i arit ka shënuar sot një rekord historik, duke kaluar për herë të parë nivelin prej 3,800 dollarësh. Ky zhvillim në tregjet financiare vjen në një periudhë kur pritshmëritë për ulje të normave të interesit nga Rezerva Federale e SHBA kanë rritur ndjeshëm kërkesën për ar, i konsideruar tradicionalisht si një nga asetet më të sigurta në kohë pasigurie.
Dobësimi i dollarit amerikan krahasuar me monedhat e tjera ka kontribuar gjithashtu në rritjen e çmimit, duke nxitur investitorët të zhvendosin kapitalin e tyre drejt metaleve të çmuara. Ekspertët theksojnë se bankat qendrore po shtojnë blerjet e arit, ndërsa edhe investitorët institucionalë po e përdorin atë si mburojë ndaj inflacionit dhe luhatjeve në tregjet valutore.
Rritja e çmimit mbështetet edhe nga paqartësitë ekonomike globale. Tensionet gjeopolitike, debatet mbi borxhin amerikan dhe frika e një ngadalësimi ekonomik botëror kanë forcuar perceptimin e arit si “strehë të sigurt”. Për shumë investitorë, ky është një sinjal se metalet e çmuara do të vazhdojnë të mbeten një element i rëndësishëm në portofolët e tyre, pavarësisht kostos së lartë aktuale.
Megjithatë, analistët paralajmërojnë se lëvizjet e ardhshme të çmimit do të varen kryesisht nga vendimet e politikës monetare dhe ecuria e ekonomisë globale. Nëse Fed nis me të vërtetë një cikël uljesh të normave të interesit, ari mund të vazhdojë ngjitjen e tij, duke shënuar nivele të reja rekordi në muajt në vijim.
Marrë nga Finnacial Times
