Një qytetar që bashkëpunoi me emisionin investigativ Fiks Fare për të zbuluar një skemë ryshfeti në Policinë e Rinasit është kërcënuar me jetë disa ditë më parë.
Ngjarja ka ndodhur në datën 20 prill 2026, teksa qytetari në fjalë fillimisht ka marrë një telefonatë kërcënuese dhe më pas disa mesazhe, teksa ai ka kërkuar sërish ndihmën e emisionit për të zbuluar se kush qëndron pas kësaj kanosje.
Në një intervistë, qytetari tregon se telefonata ka zgjatur disa minuta, ndërsa numri ishte i zbuluar. “Numri nuk është i fshehtë. Personi mu drejtua me ton kërcënues, shantazhues dhe më pas ka filluar me sharje. I kërkova të identifikohej, por nuk ma tha emrin. Dyshova se ishte i njëjti efektiv që unë kam denoncuar edhe në emisionin ‘Fiks Fare’ në tetor 2025, ndaj ju drejtova sërish” thotë ai.
Më tej shpjegon se pas telefonatës, i ka kërkuar që personi të identifikohej, ndërsa ai i ka shkruar se “jam ai djali që i ke hyrë në hak”. “Më pas kam shkuar në Komisariatin e Policisë Nr.4 në Tiranë dhe kam depozituar një kallëzim penal. Një efektiv policie ka zbuluar se pas atij numri qëndronte ish-punonjësi Kevin Kosova, i cili në atë kohë u pezullua dhe më pas u ndalua” shton qytetari.
Policia ka marrë kallëzimin dhe ka bërë këqyrjen e telefonit të qytetarit. “Oficeri e mori në telefon në syrin tim dhe e pyeti se kush ishte. Ai nuk foli dhe e mbylli telefonin” përfundon qytetari, teksa thotë se si ka mundësi që një efektiv e kërcënon hapur.
Fiks Fare është interesuar pranë Komisariatit të Policisë Nr,4 në Tiranë, për hetimet e mëtejshme, teksa oficeri që ka marrë kallëzimin ka deklaruar se “kallëzimi është bërë për kanosje dhe kallëzimi është referuar në Prokurorinë e Tiranës”.
Në muajin tetor 2025, emisioni investigativ Fiks Fare transmetoi një investigim mbi një skemë ryshfeti në Komisariatin e Policisë pranë Aeroportit Ndërkombëtar të Rinasit, ku dhjetëra punonjës policie dyshohej se merrnin ryshfet nga qytetarët për t’i ndihmuar të kalonin drejt vendeve të zonës Shengen, pavarësisht problemeve me dokumentacionin apo afatet e qëndrimit.
Fiksi faktoi me zë dhe figurë veprimet e punonjësit Kevin Kosova, i cili i mori para bashkëpunëtorit të emisionit, në këmbim të kalimit në kufi. Ata realizuan dy takime në Tiranë, ku efektivi e orientonte qytetarin në sportelin ku duhet të paraqitej dhe personin që duhej të kërkonte në aeroport.
Gjatë bisedave, efektivi i policisë e siguroi bashkëpunëtorin se “nuk kishte pse të shqetësohej për afatet”, ndërsa në një tjetër moment ai i mori shumën prej 100 mijë lekë të vjetra, duke i konsideruar si të “mjaftueshme” për kalimin. Më pas, në momentin që qytetari shkoi në Rinas, efektivi i dërgonte foto të sporteleve dhe emra të efektivëve të tjerë që ishin në turn, për të mundësuar kalimin.
Marrë nga Top Channel
