Milani ka nisur një revolucion të vërtetë pas mbylljes zhgënjyese të sezonit në Serie A.
Klubi kuqezi ka zyrtarizuar largimin e disa prej figurave kryesore drejtuese dhe teknike, duke konfirmuar fundin e një projekti që nuk arriti objektivat e vendosur nga pronarët.
Përmes një komunikate zyrtare të publikuar pas humbjes ndaj Kaljarit, drejtuesit e klubit pranuan se sezoni ishte një “dështim i qartë”, sidomos pas rënies drastike në javët e fundit të kampionatit.
Milani bëri të ditur se me efekt të menjëhershëm janë larguar administratori deleguar Xhorxho Furlani, drejtori sportiv Igli Tare, trajneri Masimiliano Alegri dhe drejtori teknik Xhefri Moncada.
Në deklaratë thuhet se objektivi kryesor i sezonit ishte rikthimi në Ligën e Kampionëve dhe krijimi i një baze të fortë për të luftuar vazhdimisht për titullin në Serie A.
Sipas klubit, për pjesën më të madhe të sezonit skuadra ishte në garë për kreun, por rezultatet e fundit shkatërruan gjithçka.
“Është koha për ndryshim dhe një riorganizim të plotë të sektorit të futbollit”, thuhet në komunikatën e Milanit, ndërsa drejtuesit falënderuan të larguarit për punën dhe përkushtimin e treguar gjatë periudhës së tyre në klub.
Largimi i Igli Tares pas një periudhe të shkurtër në drejtimin sportiv të klubit ka surprizuar tifozët, ndërsa shkarkimi i Alegrit vjen pas kritikave të shumta për paraqitjet e skuadrës në muajt e fundit.
Milani ka bërë të ditur se emrat e rinj që do të marrin drejtimin e klubit do të zbulohen në ditët në vijim, me synimin për të ndërtuar një projekt të ri konkurrues për sezonin e ardhshëm.
Marrë nga Sportmediaset.it
