Sportistët fitojnë milionat përmes kontratave fitimprurëse, nga reklamat dhe burimet e tjera, siç janë rrjetet sociale.
Revista e biznesit “Forbes” ka publikuar renditjen e sportistëve më të paguar.
Dhjetë sportistët më të paguar së bashku fitojnë më shumë se një miliard franga zvicerane në vit. Renditja bazohet në 12 muajt e fundit, ndërsa u publikua në fund të muajit maj. Një futbollist është lider i padiskutueshëm.
10 – Kevin Durant (basketboll)
Kevin Durant, 36-vjeçar, ka luajtur për Phoenix Suns në NBA nga viti 2023. Sipas “Forbes”, të ardhurat e tij vjetore, për 12 muajt e fundit, ishin pak mbi 80 milionë franga zvicerane. Më shumë se gjysma e kësaj shume (50 milionë) nuk vjen nga karriera në basketboll, por nga aktivitete të tjera biznesi.
9 – Shohei Ohtani (bejsboll)
Shohei Ohtani, 30-vjeçar, nuk është aq i njohur në Evropë sa sportistët e tjerë. Ai është lojtar japonez i bejsbollit që luan për Los Angeles Dodgers në ligën amerikane të bejsbollit (MLB) që nga viti 2024. Forbes zbulon të ardhurat vjetore prej 83 milionë frangash të Ohtanit. Pjesa më e madhe e të ardhurave të tij vjen nga sponsorizimet dhe marrëveshjet e reklamave për tregun aziatik.
8 – Karim Benzema (futboll)
Futbollisti më i miri i vitit 2022 është i teti në renditjen aktuale të sportistëve më të paguar. Pasi fitoi “Topin e Artë” në vitin 2022, Karim Benzema vendosi të mos e zgjaste kontratën e tij me Real Madridin dhe u transferua në Arabinë Saudite. Atje ai u bë golashënuesi i tretë më i mirë i ligës edicionin e kaluar. Të hyrat vjetore të Benzemas janë 84 milionë franga, sipas “Forbes”.
7 – Juan Soto (bejsboll)
Superylli 26-vjeçar i bejsbollit nga Republika Dominikane nënshkroi një megamarrëveshje 15-vjeçare në dhjetor të vitit 2024, me vlerë 765 milionë dollarë. Është kontrata me kohëzgjatjen më të madhe në historinë e sporteve profesionale. Juan Soto më parë kishte refuzuar një ofertë nga New York Yankees, që i kishte ofruar më shumë se 760 milionë dollarë. Sipas “Forbes”, ai merr 92 milionë franga në vit.
6 – LeBron James (basketboll)
Kush nuk e njeh? LeBron James renditet i gjashti me të hyra vjetore prej 107 milionë frangash. Basketbollisti amerikan është aktualisht lojtar i Los Angeles Lakers. Megjithatë, ai nuk fiton shumicën e të ardhurave nga basketbollit. Forbes raporton se James fiton rreth 79 milionë franga nga reklamat, sponsorët dhe si sipërmarrës.
5 – Lionel Messi (futboll)
Në cilën renditje të më të mirëve nuk shfaqet Messi? Sipas “Forbes”, Lionel Messi ka fituar 126 milionë franga në 12 muajt e fundit përmes sponsorizimit dhe kontratës së tij me Inter Miamin e Shteteve të Bashkuara të Amerikës.
4 – Dak Prescott (futboll amerikan)
Rayne Dakota i njohur si Dak Prescott luan futboll amerikan. Në shtator 2024, ai nënshkroi kontratë katërvjeçare në vlerë prej 240 milionë dollarësh. Kjo e bëri atë lojtarin më të paguar në historinë e NFL-së. Përveç përfitimit nga paraqitjet në fushë, ai fiton edhe miliona nga marrëveshjet e sponsorizimit. Ai fitoi 128 milionë dollarë vitin e kaluar.
3 – Tyson Fury (boks)
Tyson Fury, një boksier britanik i kategorisë së rëndë, zë vendin e tretë në renditjen e “Forbes” për sportistët më të paguar në botë. Të hyrat e tij janë 137 milionë franga zvicerane.
2 – Stephen Curry (basketboll)
Me 188 centimetra, ai është një basketbollist i vogël, por “kuleta” e tij është më e madhe se gati e çdo lojtari tjetër. Përmes sportit të basketbollit, si fytyrë e markës ‘Under Armour” dhe aktiviteteve si sipërmarrës, ai fitoi 146 milionë franga.
1– Cristiano Ronaldo (futboll)
Kur bëhet fjalë për paratë e fituara, askush nuk mund të konkurrojë me portugezin, i cili luan për Al Nassr në Arabinë Saudite. Ai fitoi një shumë të pabesueshme prej 222 milionë frangash vitin e kaluar. Ronaldo është kërkuar nga kompani të shumta për vite me radhë si imazh reklamash. Ai ka mbi 600 milionë ndjekës në Instagram. Një postim i shpërndarë nga portugezi vlen disa milionë franga.
Nëse do t’i llogariteshin 40 orë pune në javë, Ronaldo do të fitonte pak më shumë se 106 mijë franga në orë.
Marrë nga Forbes
