Vala e ndërtimeve të kullave shumëkatëshe, e cila prej vitesh ka karakterizuar Tiranën, vijon të shtrihet edhe në qytete të tjera të vendit, sidomos pranë bregdetit.
Bëhet fjalë për ndërtimin e një kompleksi rezidencial dhe hotelerie me dy kulla deri në 24 kate, projekt që po zhvillohet nga shoqëritë “EN Construction” sh.p.k. dhe “Dakz” sh.p.k. në lagjen “Uji i Ftohtë”, përgjatë aksit Vlorë-Orikum.
Sipas lejes së ndërtimit të firmosur nga vetë Edi Rama, projekti po zhvillohet në një truall me sipërfaqe 6,306.27 metra katrorë, sipas të cilit kompleksi do të përbëhet nga dy kulla. Njëra do të ketë funksion rezidencial dhe shërbimesh, ndërsa kulla tjetër do të shërbejë si hotel dhe apart-hotel.
Megjithatë, banorët e zonës pretendojnë se në terren situata është ndryshe nga ajo që parashikohet në dokumentacion.
Në denoncimin e dërguar në redaksinë e Boldnews.al, ata deklarojnë se fadromat e firmës ndërtuese kanë prekur muret rrethuese të pronave të tyre dhe se po tentohet të ndërhyhet në oborret private për vendosjen e pilotave të objektit.
Sipas tyre, mjetet e rënda të kompanive ndërtuese kanë ndërhyrë përtej kufijve të truallit ku është miratuar projekti, duke prekur sipërfaqe që ata i konsiderojnë pronë private dhe për të cilat deklarojnë se disponojnë dokumentacion pronësie.
“Jemi disa banorë të lagjes së 7 Pallateve. Në mes të lagjes po ngrihet një objekt 24-katësh. Nuk ruhen kushtet teknike dhe nuk mbahet largësia nga objektet ekzistuese. Po na prishin muret rrethuese dhe po tentojnë të futen me pilotat në oborret tona, të cilat i kemi me dokumente”, thuhet në denoncimin e banorëve.
Sipas banorëve, për situatën janë vënë në dijeni edhe institucionet shtetërore. Ata deklarojnë se i janë drejtuar Policisë së Shtetit dhe Gjykatës, por deri më tani nuk kanë marrë një zgjidhje konkrete.
“Jemi ankuar në gjykatë dhe në polici, por nuk kemi marrë zgjidhje. Jetojmë prej 40 vitesh në këtë lagje dhe nuk kemi pasur kurrë shqetësime të tilla. I bëjmë thirrje institucioneve të dalin në terren dhe të verifikojnë situatën”, shprehen ata.
Duket se ndërtimi i kullave shumëkatëshe, i paraqitur si simbol i zhvillimit urban dhe investimeve të reja, po shoqërohet gjithnjë e më shpesh me përplasje mbi pronësinë dhe zaptimin e hapësirave private të qytetarëve, ku këta të fundit mbeten të pambrojtur përballë fuqisë së betonit dhe kapitalit.
Marrë nga Boldnews.al
