Duke filluar nga e premtja e javës së kaluar, një problem, në dukje tekni në faqen e-Albania, ka krijuar një lloj kolapsi në pajisjen e subjekteve tregtar me aplikimin për leje ndërtimi apo për licensa të ndryshme.
Sipas informacionit të siguruar nga “Boldnews.al”, rezulton se sistemi elektronik që menaxhohet nga Agjencia Kombëtare e Shoqërisë së Informacionit (AKSHI), nuk përgjigjet, duke rrezikuar përmbushjen e afatave ligjore nga aplikuesit.
Çfarë ka ndodhur konkretisht? Me krijimin e bazës së të dhënave të AKSHI-it, subjektet tregtare, mes të cilëve kompanitë ndërtuese, duhet të aplikojnë pranë e-Albania-s për t’u pajisur me lejet e ndërtimit.
Gjatë procedurës administrative, institucionet lokale apo të tjera që miratojnë lejet e ndërtimit, mund të konstatojnë mungesën e një ose disa dokumentave, dhe u kërkojnë aplikuesve që të kryejnë plotësimet e nevojshme. Afati administrativ për plotësimin e mangësive është 5 ditë.
Nga fundjava e kaluar, e-Albania kryen veprimet e pranimit të aplikimeve fillestare, veprimin e kthimit të përgjigjes nga institucionet për plotësimin e dokumentacionit të munguar. Por, kur subjektet tregtare tentojnë të plotësojnë dokumentacionin, sipas kërkesave të institucioneve, e-Albania nuk u pranon aplikimin.
Kjo situatë po ndodh prej të paktën 3-4 ditësh, duke rrezikuar që subjektet tregtare, për shkaqe që nuk varen prej tyre, por për arsye të defekteve teknike të e-Albania-s, të humbasin afatin administrativ 5-ditor, një situatë që mund të shoqërohet me refuzimin e aplikimeve të tyre.
E-Albania është një bazë e madhe të dhënash publike, e cila konsiderohet nga kryeministri Edi Rama si një “gur kurore” në strategjinë e qeverisë së tij për “Shqipërinë dixhitale”.
Megjithatë, prej kohës së krijimit të saj dhe, pavarësisht se janë shpenzuar dhjetra miliona euro nga AKSHI për krijimin dhe mirëmbajtjen e tij, sistemi e-Albania përballet shpesh me problematika teknike, të cilat e shndërrojnë këtë bazë të dhënash nga një lehtësi për qytetarët e bizneset, në një hall të shtuar.
Marrë nga Boldnews.al
