Policia e Ekuadorit ka prangosur një ndër “hallkat” kyçe të mafias. Sipas asaj që mediat vendase raportojnë mësohet se gjatë një operacioni policor në një zonë banimi në Samborondon, u bë i mundur identifikimi dhe arrestimi i Panfilo Colonico, biznesmenit italian i cili ishte i lidhur me strukturat kriminale ndërkombëtare.
Gjatë operacionit, oficerët gjetën në shtëpinë e biznesmenit dhe sekuestruan para të falsifikuara si dhe të dhënat dhe prova të cilat lidhin Colonicon me kriminelët.
Në një deklaratë zyrtare, ministri i Brendshëm i Ekuadorit, sqaroi se Panfilo Colonico i cili mbante shtetësi italiane dhe kanadeze, dyshohet se është i lidhur me mafian shqiptare, një organizatë kriminale transnacionale e dedikuar për pastrim parash, trafik droge dhe korrupsion publik.
I njohur ndryshe si “Benny Colinico”, biznesmeni dyshohet se është vendosur në Ekuador nën një fasadë ligjshmërie, duke ushtruar aktivitete në biznes.
Autoritetet tanimë kanë filluar hetimet nëse biznesmeni italian ishte pjesë e një rrjeti të pastrimit të parave, ose falsifikimit të tyre.
“Biznesmeni” që qëndroi në Ekuador:
Emri Benny Colonico nuk është një emër i panjohur për mediat dhe publikun ekuadorian. Në tetor të vitit 2022, ai u përfol për një lidhje me prezantuesen televizive, Carolina Jaume. Madje më vonë u tha se ai e përndiqte atë. Aso kohe ai u identifikua si një “magnat italian” që kishte mbërritur në Ekuador në mars të 2020 me plane pushimesh, por përfundoi duke investuar gati një milion dollar për hapjen e një zinxhiri restorantesh italiane në Guayaquil.
Benny deklaroi asokohe se e takoi prezantuesen për punë, si pjesë e një fushate promovuese për rrjetin e tij të restoranteve. Ai tha se e admironte dhe e vlerësonte si një person “të përulur dhe të bukur”. Gjithashtu biznesmeni pohoi se marrëdhënia e tyre ishte thjesht një marrëdhënie miqësore dhe biznesi.
Emri i tij u përfol gjerësisht edhe në verën e dy viteve më parë, ku një qershor të 2023 ai u rrëmbye në restorantit që kishte në pronësi në qytetin e Guajakilit.
Madje, gjatë operacionit për lirimin e tij u vra dhe një nga kriminelët. Ndërkohë më herët, në janar të vitit 2023, ai u përfshi në një shkëmbim zjarri para një qendre tregtare.
Marrë nga Newsbomb.al
