Një shtetase ruse, e cila thotë se jeton në Shqipëri me partnerin e saj, është ankuar ndaj një ukrainaseje, e cila ka refuzuar t’i ofrojë shërbim estetik.
Rusja M.S., 25-vjeçe, kontaktoi përmes Instagramit një qendër estetike në Tiranë dhe la takim për trajtimin e thonjve.
Por më pas, e reja thotë, se është pyetur “nga je?”. “Jam nga Rusia”, është prezantuar M.S. Në këtë moment, ajo është njoftuar se “nuk ju ofrojmë shërbime shtetasve rusë, se vendi ynë është në luftë me Rusinë”.
E pyetur nga komisionerët kundër diskriminimit, ukrainasja D.K. është shprehur se i vjen keq për përgjigjen, por ky reagim i ndodhi krejt spontanisht.
“Më vjen keq, por e bëra të ruaj mirëqenien shpirtërore timen dhe të stafit, sepse vendi im është në luftë”, deklaron ukrainasja që zhvillon biznesin në Tiranë, në afërsi të Komunës së Parisit.
Aktualisht çështja është nën shqyrtim nga Komisioneri Kundër Diskriminimit dhe palët janë njoftuar për seancë.
Marrë nga Top Channel
