Noterët duket se kanë qenë në fokus të Agjencisë së Inteligjencës Financiare gjatë vitit 2024, si subjekte kyç në luftën kundër pastrimit të parave.
Në raportin vjetor, AIF njofton se janë evidentuar subjekte që nuk përmbushin nivelin e duhur të përputhshmërisë me kuadrin rregullator për PPP/FT, për të cilët ka vijuar procesi i shqyrtimit të kundërvajtjeve administrative, deri në dhënien e vendimit të arsyetuar me masë administrative “gjobë”, “paralajmërim” apo “pushim” në përputhje me dispozitat përkatëse ligjore.
Gjatë këtij viti janë marrë në shqyrtim nga Komisioni i Shqyrtimit të Kundërvajtjeve Administrative gjithsej 27 subjekte, por janë vendosur vetëm 12 gjoba, pra më pak se gjysma e rasteve të marra në shqyrtim, me vlerë totale prej 4.6 milionë lekë.
Minimumi i gjobës së aplikuar për vitin 2024 ka qenë 200,000 lekë dhe maksimumi 1,000,000 lekë. Vlera totale e gjobave të vendosura është 4,600,000 lekë.
Sipas kategorisë të subjekteve janë vendosur masat administrative (gjoba) për 12 subjekte në total, prej tyre për: subjektet “Noter” janë dhënë 4 masa administrative me vlerë totale 1,300,000 lekë, për subjektet ZKV janë dhënë 2 masa administrative në vlerën totale 1,000,000 lekë, 3 masa administrative janë dhënë për shoqëri ndërtimi me vlerë 900,000 lekë, 2 masa administrative për subjektet “Ndërmjetës i Pasurive të Paluajtshme” me vlerë 400,000 lekë, si dhe 1 masë administrative në vlerën totale të 1,000,000 lek për 1 subjekt “SHKK”.
Marrë nga Ekofin.al
