Festa për titullin e 21-të të Interi ka pushtuar Milanon. Pas fitores ndaj Parmës në ‘San Siro’, që vulosi matematikisht kampionatin, zikaltrit dhe tifozët e tyre festuan së bashku në një natë të paharrueshme.
Në përfundim të ndeshjes, atmosfera në stadium ishte elektrizuese. Lojtarët dhe trajneri Cristian Chivu shkuan një nga një poshtë tribunës “Curva Nord”, duke marrë ovacionet e tifozëve, ndërsa nuk munguan as koret dhe këngët dedikuar secilit prej tyre. Festimet në fushë u shoqëruan edhe me batuta ndaj rivalëve të përjetshëm, me protagonistë si Marcus Thuram, Federico Dimarco dhe Lautaro Martínez.
Por festa nuk përfundoi në stadium. Më pas, skuadra, stafi dhe drejtuesit u mblodhën për një dolli në një hotel pranë zonës së ‘San Siros’, përpara se disa nga lojtarët të zhvendoseshin në zemër të qytetit, në ‘Piazza del Duomo’, ku mijëra tifozë kishin nisur festimet që gjatë minutave të fundit të ndeshjes.
Thirrja e Thuramit “Shihemi të gjithë aty” vetëm sa e shtoi entuziazmin, por në fakt sheshi ishte mbushur shumë më herët. Mes tymueseve, fishekzjarrëve dhe këngëve, tifozët zikaltër krijuan një atmosferë të jashtëzakonshme.
Rreth orës 02:00 të natës, mbërritja e lojtarëve si Thuram, Dimarco dhe Francesco Pio Esposito u prit me ovacione të mëdha. Më pas, atyre iu bashkuan edhe Lautaro dhe Nicolò Barella, të cilët me megafon në dorë udhëhoqën koret e tifozëve, duke u kthyer për disa çaste në “liderë ultras”.
Marrë nga Ansa.it
