Sipas vendimit, nga data 1 shkurt, Vlora nuk do të ketë më Kadastër vendore, ndërsa funksionet e administrimit dhe menaxhimit të pronave do të kryhen nga strukturat qendrore në kryeqytet.
Me këtë vendim, nga Vlora largohet një tjetër institucion shtetëror, duke e përqendruar administrimin e pronësisë jashtë qarkut, në një kohë kur ky sektor ka qenë ndër më problematikët ndër vite.
Vlora renditet ndër qarqet me konfliktet më të shumta mbi pronën, problematika që janë shoqëruar me akuza për tjetërsime, mbivendosje dhe abuzime në proceset e regjistrimit. Këto zhvillime janë reflektuar edhe në ndryshimet e shpeshta në drejtimin e institucionit, ku gjatë dy viteve të fundit është shënuar një numër i pazakontë ndërrimesh drejtorësh.
Zhvendosja e Kadastrës drejt Tiranës vjen pas një periudhe të gjatë paqëndrueshmërie institucionale dhe përpjekjesh të pasuksesshme për normalizimin e funksionimit të saj në nivel vendor.
Ende nuk ka një sqarim zyrtar nëse kjo lëvizje do të ndikojë në përshpejtimin e shërbimeve për qytetarët apo në mënyrën e trajtimit të dosjeve të pronësisë, ndërsa mbetet e paqartë se si do të menaxhohet fluksi i kërkesave që vijnë nga një prej qarqeve me volum më të lartë problematikash pronësore në vend.
Marrë nga Skyweb.al
