Këshilli Mbikqyrës i Bankës së Shqipërisë miratoi dje licensimin e Jet Bank, që synon të jetë banka e parë që do të operojë totalisht në mënyrë digjitale në vendin tonë. Kjo shoqëri është themeluar në Shqipëri gjatë muajit Shtator të këtij viti me një kapital prej 3.5 milionë lekësh të rinj, ndërsa themeluesi dhe zotëruesi i saj është shtetasi izraelito-britanik Idan Avishai.
Administratore e bankës do të jetë një personazh i njohur në sektorin financiar në Shqipëri, shtetasja Fatbardha Rino. Kjo e fundit më herë ka mbajtur disa pozicione drejtuese në bankat e nivelit të dytë në Shqipëri, si dhe ka qenë drejtoresha ekzekutive e Iute pay. Po ashtu anëtarët e tjerë të bordit janë shtetasit Oliver Hemmer, Rami Solomon, edhe ata me origjinë izraelite.
Me miratimin paraprak të licensës nga Banka e Shqipërisë, JET Bank do të duhet që të nisë përgatitjet për operimin në treg. JET Bank ka deri në 12 muaj kohë për të plotësuar kërkesat ligjore dhe rregullatore, nga kapitali te infrastruktura teknike, përpara se të marrë licencën përfundimtare.
Në aktivitetin e Jet Bank në QKB përshkruhet:
Aktiviteti i Shoqërisë do të përfshijë, por nuk do të kufizohet vetëm në, ofrimin e shërbimeve financiare në të gjitha format e tyre. Kjo mund të përfshijë çdo aktivitet që lidhet me lehtësimin, strukturimin, menaxhimin dhe ekzekutimin e transaksioneve financiare; menaxhimin e aseteve ose investimeve; ofrimin e shërbimeve konsulente dhe këshillimore në çështje financiare, ekonomike ose të lidhura me biznesin; dhe çdo aktivitet tjetër me natyrë financiare, investimi ose ekonomike të lejuar sipas legjislacionit në fuqi. – Shoqëria mund të kryejë gjithashtu çdo biznes ose aktivitet tjetër që konsiderohet nga Asambleja e Përgjithshme si i përshtatshëm ose i favorshëm për t’u kryer ose për t’u bërë në lidhje me ndonjë nga objektivat e mësipërme ose të llogaritura drejtpërdrejt ose tërthorazi për të rritur vlerën ose për ta bërë më fitimprurës çdo biznes, pronë ose të drejtë të Shoqërisë, në përputhje me legjislacionin shqiptar; dhe në përgjithësi të bëjë të gjitha gjërat e tjera që mund t’i duken Shoqërisë të rastësishme ose të favorshme për arritjen e objektivave të mësipërme ose ndonjërit prej tyre.
Jet Bank është subjekti i dytë që merr miratimin paraprak për të hyrë në tregun bankar shqiptar, pas bankës turke Ziraat.
Duke filluar nga viti 2015, tregu bankar shqiptar ka hyrë në një cikël përqendrimi, që solli uljen e numrit të bankave tregtare nga 16 në 11 të tilla. Me përjashtim të Bankës së Kreditit të Shqipërisë, që doli nga tregu nëpërmjet likuidimit, zvogëlimi i numrit të bankave ka ardhur nëpërmjet blerjes dhe përthithjes nga bankat konkurrente në treg. Etapa e fundit në këtë proces u zhvillua në vitin 2022, kur Alpha Bank Albania u ble dhe u përthith nga Banka OTP Albania.
